Waşington-SANA
Serokê Amerîkî Donald Trump tekez kir ku hevdîtina wî bi Serok Ehmed El-Şeri’ re ku vê dawîyê li Koşka Spî pêk hat, avaker bû. Trump destnîşan kir Şazadeyê Cînişîn ê Erebistana Siûdîyê Mîr Mihemed kurê Selman û Serokê Tirkîyî Recep Teyyip Erdogan jê xwestine ku cezayan ji ser Sûrîyê rake û derfetekê bo avakirinê bide wî welatî.
Trump di konferanseke çapemenîyê de piştî hevdîtina wî bi Şazadeyê Cînişîn ê Erebistana Siûdîyê Mîr Mihemed kurê Selman re li Koşka Spî duh got: “Mîr Mihemed kurê Selman bi min re têkilî danî û ji min xwest ku ez cezayan ji ser Sûrêyê rakim; ji ber ku ew dixwaze derfetek bi Sûrîyê bê dayîn ku careke din xwe li ser xwe ragire.” Trump wisa pê de çû: “Serok El-Şeri` berî demekê li vir bû û hevdîtina bi wî re avaker bû û ew kesekî xurt e û Sûrîye dê pêşveçûneke mezin bi dest bixe.”
Donald Trump gotina xwe wiha domand: “Serokê Tirkîyê Recep Teyyip Erdogan jî bi min re têkilî danî û ji min xwest ku ez cezayan ji ser Sûrîyê rakim û ji min re got: ‘Heke cezayên li ser Sûrîyê neyên rakirin, dê bê derfet bimîne û divê derfetê bi Sûrîyê were dayîn.”
Trump bi berdewamî got: “Erebistana Siûdî hevalbendeke bihêz û hevpareke girîng e, û Mîr Mihemed kurê Selman di hemî astan de zilamekî hêja û balkêş e û her gav li ser welatê xwe difikire û dixwaze Şaneşîna Siûdî mezin bike.”
Mîr Mihemed kurê Selman ji hêla xwe ve da zanîn ku hevkarîya bi Amerîkayê re di zîrekîya destkird de fersendên rastîn diafirîne, û peymanên nû di heman demê de teknolojî, madeyên xam û madenên pêşketî jî li xwe digirin.
Ji bo xurtkirina têkilîyên dualî di navbera her du welatan di warên cuda cuda de, Şazadeyê Cînişîn ê Erebistana Siûdîyê duh bi serdaneke kar a fermî gihîştibû Waşingtonê.
