Beyrût – SANA
Alîkarê Wezîrê Veguhastinê yê Sûrîyê yê karûbarên veguhestina bejayî Mihemed Rehal, li Beyrûtê, ligel Wezîrê Karên Giştî û Veguhestinê yê Libnanê Fayiz Resamnî civîya, da ku mijarên jinûveçalakkirina girêdana rêyên trênê di navbera Sûrîye û Libnanê de û xurtkirina tevgera veguhestin û bazirganîyê gotûbêj bikin.
Xalên herî girîng ên lihevkirinê:
- Nûjenkirina xeta hesinî: Di peymanê de hatiye ku dê encamên gera teknîkî ya kontrolkirina xetê bên şopandin, pêdivîyên nûjenkirin û xebitandina wê bên dîyarkirin û mekanîzmayên temamkirina gavên teknîkî yên pêwîst jî gotûbêj bibin.
- Girêdana Bendera Terablusê: Di civînê de li ser temamkirina lêkolînên teknîkî û aborî hat lihevkirin, ji bo girêdana Bendera Terablusê bi tora hesinî ya Sûrîyê ve bi rêya stasyona El-Ekarî ya ku dighêje Himsê.
- Komxebateke hevbeş: Di gotûbêjan de li ser amadekarîyên destpêkirina komxebateke lêkolînê derbarê encamên aborî yên dê werin bidestxistin, lêçûn, çavkanîyên fînansekirinê û mekanîzmaya cîbecîkirinê, li hev kirin.
Nirxandina rewşa li ser erdê:
Şanda Sûrîyê gereke meydanî li ser rêya xeta hesinî ya ku ji Bendera Terablusê dighêje sînorê Sûrîyê û stasyona El-Ekarî pêk anî, da ku astengîyên teknîkî destnîşan bike, di wê gerê de rewşa stasyona trênê û xeta ku diçe El-Ibudîyê kontrol kirin, ku dirêjîya beşê di hundirê Libnanê de nêzî 35 kîlometryan e.
Ev destpêşxerî ji bo wê yekê ye ku karên teknîkî li ser bingeha raporên şêwirmendan temam bikin, da pêdivîyên dawî yên projeyê dîyar bibin, û hevkarîya dualî ya di navbera her du welatan de berdewam bimîne, bi armanca pêşvebirina sektora veguhestinê û xizmetên lojîstîk.
