Waşington-SANA
Lêkolînerên Enstîtuya Teknolojîyê ya Massachusettsê li Amerîkayê, nêzîkatîyeke dermankirinê ya nûjen eşkere kirin ku dibe asoyên nû li pêşîya vegerandina dîtinê ji bo mezinên ku bi nexweşîya “Ambliyopi” ango tembelîya çav ketine, veke.
Rojnameya “The Independent” a Brîtanî dîyar kir ku ev vedîtin xwe dispêre prensîba benckirina demkî ya tora çavê (retîna) lawaz, bi armanca jinûveçalakkirina rêça dîtinê ku mejî ew bi salan paşguh kiribû.
Encamên taqîkirinên ku li ser mişkan hatine kirin nîşan dan ku benckirina tora çav ji bo çend rojan bes e ku bersivdana dîtbarî di mejî de ji bo çavê nexweş vegerîne, heta piştî gihîştina qonaxa mezinbûnê jî. Lewra îşaretên demarî yên ku ji çavê lawaz derdikevin bilind bûn û nêzîkî astên çavê saxlem bûn.
Nesaxîya ambliyopi yan tembelîya çav yek ji berbelavtirîn alozîyên dîtinê di nav zarokan de tê hesibandin, ku li dora ji sedî 3 ji xelkê pê dikeve. Bi gelemperî bi bikaranîna berçavkên bijîşkî yan jî bi rêya vegirtina çavê saxlem di salên destpêkê yên werarbûnê de tê dermankirin.
