Şam – SANA
Wezîrê Dadê Mezhir El-Weys tekez kir ku dest bi cîbicîkirina mersûma efûyê ya hejmar 39 a sala 2026an hatiye kirin, ji bo çareserkirina qerebalixa zindanan û paşmayên rejîma berê; heta niha 1500 kes hatine berdan. Wî dîyar kir ku ev mersûm dê bandorên hikumên neheq ên li dijî nîv mîlyon Sûrîyan ji holê rake û bi mîlyonan rênimayên keyfî betal bike, her wiha tekezî li ser hêsankirina vegera koçberan û rakirina qedexeyên yasayî li ser wan bi awayekî otomatîk kir, ji bo misogerkirina tevlîbûna wan di nav civakê de.
Wezîr tekezî li ser destûrîbûna mersûma efûyê wekî pêdivîyeke yasayî kir, û dîyar kir ku ew kesên destên wan di rijandina xwîna Sûrîyan de heye jê hatine derxistin. Her wiha wî ragihand ku reformên dadwerîyê û paqijkirina wê ji wan kesên ku di binpêkirinan de cî girtine dest pê kirine, ev yek bi rêya xurtkirina serxwebûnê, veguhastina dîjîtal û çalakkirina teftîşa dadwerîyê ji bo misogerkirina dadperwerîyê pêk tê.
El-Weys piştrast kir ku dadwerîya veguhêz rêyeke yasayî ya hevseng e û dê di sala 2026an de bibe sedema dadgehkirinên eşkere. Wî eşkere kir ku 96 hezar dozên sêdaredan û îşkenceyê yên serdema pergala berê hatine belgekirin ji bo şopandina dosyaya windayan. Her wiha wî ragihand ku şopandina navdewletî ya sembolên revîyayî yên rejîma berê berdewam e, da ku dewleta yasa û wekhevîyê were çespandin û nehiştina filitandina ji cezayan were misogerkirin.
