Heseke – SANA
Cîgirê Parêzgarê Hesekê Ehmed El-Hîlalî îro Pêncşemê di daxuyanîyekê de ji bo beşa Kurdî ya ajansa SANAyê tekez kir ku Koşka Dadwerîyê li her parêzgehekê sembola serwerîya dewletê ye, û destnîşan kir ku nabe ev serwerî bibe mijara ti nakokîyan.
El-Hîlalî dîyar kir ku avahîya Koşka Dadwerîyê li Hesekê di heyama borî de vala bû, û bal kişand ser wê yekê ku ew tabloyên li ser avahîyê hatine daliqandin nû ne û ne kevn in. Her wiha anî ziman ku vekişîna ji qadê piştî êrîşa li ser koşkê, pêngaveke hûrbîn bû ji bo dûrketina ji alozîyan û parastina aramîyê.
Derbarê geşedanên meydanî yên avahîyê, Cîgirê Parêzgar eşkere kir ku soz hatine dayîn ku sibe Înê karên nûjenkirina wan zîyanên ku gihîştine koşkê dest pê bikin û biryar e roja Şemîyê avahî bi awayekî fermî were wergirtin.
El-Hîlalî her wiha behsa hûrgilîyên rûbirûbûnê kir û dîyar kir ku endamên “Asayîşê” yên ku tevlî Hêzên Ewlekarîya Hundirîn bûne, li dijî êrîşkarên ser Koşka Dadwerîyê sekinîne, û di encamê de di nav wan de birîndar çêbûne. Di heman çarçoveyê de, El-Hîlalî pesnê hewlên wan alîyan da ku ber bi tevlîbûn û yekbûnê di nav Hêzên Sûrîya Demokratîk (HSD)ê de gavan davêje
Di warê dosyayên mirovî û yasayî de, El-Hîlalî tekez kir ku xebat bi rêyên berdana girtîyan û misogerkirina vegera koçberan bo ser mal û milkên wan hîn berdewam e.
