Şam- SANA
Berdevkê Wezareta Hundirîn ya Sûrîyê Nûreddîn El-Baba, tekez kir ku HSDê îro li bajarê Helebê dest bi êrîşên sîstematîk kir ku bi awayekî rasterast taxên ava û nexweşxaneya El-Razî kirin armanc. Di encamê de du sivîlan jîyana xwe ji dest da û hinên din birîndar bûn, hejmarek xwebexşên Berevanîya Sivîl di nav wan de hene. Ev wekî gurkirina şer a metirsîdar tê dîtin ku dikeve çarçoveya hewildanên dubare yên vê hêzê ji bo têkbirina Peymana 10ê Adarê ya ku bi Dewleta Sûrîyê re hatiye îmzekirin.
El-Baba di hevdîtinekê de ligel kenala “El-Îxbarîya El-Sûrîye” bal kişand ser wê yekê ku dema Artêşa Sûrîyê tevgereke cihê gumanê ji xalên HSDê ber bi xalên xwe ve dît, şer dest pê kir. Piştî ku gef hat pûçkirin, HSDê endamên xwe ji xalên pişkinînê yên hevbeş vekişandin û gule bi awayekî rasterast berdan Hêzên Ewlekarîya Hundirîn, di encamê de du endamên Ewlekarîyê birîndar bûn.
El-Baba destnîşan kir ku HSDê berê armancgirtina xwe fireh kir û çend taxên Helebê û nexweşxaneya El-Razî topbaran kirin, ev bû sedem ku Artêşa Sûrîyê û Hêzên Ewlekarîya Hundirîn bersiveke rasterast bidin jêdera guleyan. Di encama bersivdanê de zêdetirî 13 endamên HSDê hatin kuştin ku fermandarekî pilebilind jî di nav wan de hebû.
Berdevkê Wezaretê dîyar kir ku Dewleta Sûrîyê hîn jî pabendî Peymana 10ê Adarê ye û binpêkirinên dubare yên HSDê belge dike û ji alîyên navdewletî yên garantor re pêşkêş dike, her wiha tekez kir ku ev êrîş dê nehêlin dewleta Sûrîyê ji çareserîyên aştîyane û dîyaloga Sûrî-Sûrî dûr bikeve.
El-Baba bal kişand ser wê yekê ku HSDê di rewşeke aloz de dijî, ji ber têkçûna wê di ferzkirina rewşeke nû ya meydanî de, û ew herdem pişta xwe bi xurtkirina xwe ya leşkerî ji alîyekî ve û alîkarîya hin welatên dijiminên Sûrîyê ji alîyê din ve girêdide. Her weha tekez kir ku her ku dem pêşve diçe Sûrîye wek dewlet bêtir rewatîya xwe ya sîyasî xurt dike, û bûrîna demê ne di berjewendîya HSDê de ye.
Berdevk bal kişand ser wê yekê ku HSDê ketiye bin bandora beşekî xwe yê bîyanî de ku dijminê hemû Sûrîyan e (di nav wan de Kurd jî) û endamên ne-Sûrî di nav wî beşî de hene, û ew ji bo têkbirina her peymaneke Sûrî-Sûrî kar dikin, her wiha kiryarên tawankarî yên wekî revandina zarokan û leşkerkirina wan û bazirganîya madeyên hişbir (bi taybetî li taxên Eşrefîye û Şêx Meqsûd li Helebê) pêk tînin.
El-Baba dîyar kir ku HSDê ji destpêkê ve rê li ketina hêzên hikûmetê bo taxên Eşrefîye û Şêx Meqsûd girtiye û ew tax kirine navendên bazirganîya madeyên hişbir û komkirina bermayîyên rejîma berê. Ev yek bû sedem ku Artêşa Sûrîyê û Hêzên Ewlekarîya Hundirîn dorpêçeke ewlehîyê li ser dergehên her du taxan deynin da ku rê li derbasbûna endamên tawankar bigirin û operasyonên revandin û qaçaxîyê bidin rawestandin.
