London-SANA
Lêkolîneran sîstemeke zîrekîya destkird bi pêş xistiye ku dikare lêkolînên zanistî şîrove bike û hewl bide ezmûn an analîzên tê de hatine, dubare pêk bîne; di gavekê de ku reng e di paşerojê de di piştrastkirina encamên zanistî û lezkirina proseya nirxandina lêkolînan de bibe alîkar.
Malpera teknolojîyê ya “TechCrunch”ê îro Yekşemê dîyar kir ku taqîgeha Brîtanî ya zîrekîya destkird “Inherent”, ku ji alîyê lêkolînerên berê yên li “Google DeepMind”ê ve hatiye damezirandin, sîstemeke bi navê “Faraday” pêş xistiye ku dikare lêkolîna zanistî bixwîne û rêbaza guncaw ji bo ezmûnkirina encamên wê dîyar bike, piştre hewl bide ku wan bi awayekî serbixwe ji nû ve hilberîne.
Şîyana dubarekirina lêkolînan wê yekê nîşan dide ku lêkolînerine din jî dikarin heman taqîkirin an analîzê li gorî heman rêbazê encam bidin û encamên wekhev bi dest bixin; ku ev yek pîvaneke girîng e di nirxandina pêbawerîya encamên zanistî de.
Li gorî taqîgeha pêşxistî, “Faraday” di ceribandinan de karî encamên hejmarek lêkolînan ji nû ve berhem bîne, her wiha li gorî hin modelên din ên zîrekîya destkird di karên taybet bi dubarekirina lêkolînan de performanseke pêşketî nîşan da.
Girîngîya vê teknolojîyê di wê yekê de ye ku dikare alîkarîya lêkolîneran bike da ku di demeke kêmtir de hejmareke zêdetir a lêkolînan lêkolîn bikin, nexasim ku dubarekirina taqîkirin û analîzan dibe ku demeke dirêj bikişîne û pêdivî bi çavkanîyên mirovî û madî yên mezin heye.
Dibe ku ev sîstem di paşerojê de bibin alîka ji bo dîyarkirina lêkolînên ku pêdivîya wan bi zêdetir ceribandinê heye, yan eşkerekirina zehmetîyên ku heye ku di dubarekirina hin encaman de derkevin holê, bi awayekî ku piştgirîyê bide hewldanên lêkolîneran ji bo xurtkirina bawerîya bi encamên zanistî.
