Mekeya Pîroz-SANA
Muzexaneya Qurana Pîroz li devera Hîrayê ya Çandî ya li Mekeya Pîroz, destnivîseke kêmpeyda ya Quranê nîşan dide ku ji rûpeleke Qurana Pîroz pêk tê û dîroka wê vedigere sedsala sêyemîn a koçî (beramberî sedsala nehemîn a zayînî). Ev perçeyê dîrokî, qonaxekê ji qonaxên destpêkê yên nivîsandina Qurana Pîroz û xwedîderketina li wê di serdemên cuda de belge dike.
Ajansa Nûçeyan a Siûdî (SPA), îro Duşemê dîyar kir ku destnivîsa ku hatiye pêşandan, beşekî ji sûreta Meryemê li xwe digire, ku li ser eyar bi hibra sor hatiye nivîsandin û nivîsa wê bê xal û bê hereke ye, ku ev yek ji taybetmendîyên herî dîyar ên qonaxên destpêkê yên nivîsandina Quranê ye. Ev taybetmendî, nirxekî dîrokî û zanistî dide vî perçeyî û rê dide serlêderên muzexaneyê ku li ser alîyekî ji pêşketina nivîsandina Qurana Pîroz û awayên tomarkirina wê di sedsalên pêşîn ên Îslamî de agahdar bibin.
Ev perçeyê kêmpeyda yê Quranê di Pirtûkxaneya Niştimanî ya Şah Fehed de tê parastin, lê pêşandana wê li Muzexaneya Qurana Pîroz derfetê dide serlêderan ku nimûneyeke dîrokî bibînin a ku qonaxa xwedîderketina li Qurana Pîroz nîşan dide, û nirxê zanistî û şaristanî yê destnivîsên Quranê di belgekirina dîroka Quranê û parastina wê de radixe ber çavan.
Muzexaneya Qurana Pîroz yek ji dezgehên sereke ye li devera Hîrayê ya Çandî ya ku li bintara Çîyayê Hîrayê ye, û ezmûneke zanistî û înteraktîf pêşkêş dike ku ronahîyê dide ser dîroka tomarkirina Qurana Pîroz.
