Şam-SANA
Şêwirmendê Karûbarên Amerîkayê di Wezareta Derve û Koçberan a Sûrîyê de, Cîhad Meqdisî, dawîhatina moleta 45 rojan ya ku ji bo Kongresa Amerîkî hatibû dayîn da ku biryara derxistina navê Sûrîyê ji lîsteya welatên piştgirên terorê di bin çavan re derbas bike, piştrast kir.
Meqdisî dîyar kir ku temambûna vê qonaxa qanûnî astengîya herî berbiçav a li pêşîya biryarê radike. Her çend hilanîna vê pênasînê bi awayekî “ji ber xwe ve” pêk nayê, lê belê derfetê dide rêveberîya Amerîkî ku dest bi gavên cîbicîkirinê yên dawî bike da ku rêkara fermî temam bike.
Navborî bal kişand ser wê yekê ku giringîya vê gavê ne tenê ji alîyê sîyasî û sembolîk ve ye, ji ber ku ew rê ji bo rakirina qedexeyan xweş dike, û nîşaneke erênî dide sazîyên darayî yên cîhanî û kompanîyan ku têkilîyên Sûrîyê bi awayekî qanûnî ber bi firehbûnê ve diçin. Ev tişt dê hêdî hêdî bi rêya tevgera veberhênan, bazirganîyê û danûstendinên bankî dîyar bibe.
Meqdisî tekezî li ser giringîya wê yekê kir ku divê cudahî hebe di navbera vê pênasînê û astengîyên din ên ku rêyên wan ên qanûnî yên serbixwe hene. Û dîyar kir ku armanca qonaxa bê ew e ku astengîyên mayî çareser bike da ku rê li ber vegera pêwendîyên asayî yên Sûrîyê veke.
Li dawîyê destnîşan kir ku pîvanên rastîn ên serkeftina dîplomatîk di bandora wê ya rastrast a li ser jîyana welatîyan de ye, bi awayekî ku hemaheng be ligel rênimayîyên Serok Ehmed El-Şere’ û Wezîrê Derve Es’ed Hesen El-Şeybanî, bo xurtkirina karê sazîyan bi awayê ku têkevin xizmeta Sûrîyan.
