Şam – SANA
Endamê Komarî yê Kongresa Amerîkî, Joe Wilson, tekez kir ku gelê Sûrîyê bi xweragirî û rijdîya xwe li ser jinûveavakirina welatê xwe piştî salên şerê xopan, çavkanîyeke rastîn a îlhamê ji bo cîhanê ye. Destnîşan jî kir ku dem hatiye ku Sûrîye karibe rola xwe û pêgeha xwe li herêm û cîhanê vegerîne.
Wilson ji kanala El-Îxbarîyê ya Sûrî re got: “Gelê Sûrî li hundir û revenda Sûrî li Amerîkayê, coşeke mezin li hemberî guhertinên erênî yên ku li welatê wan diqewimin nîşan dan,” û bal kişand ser wê yekê ku Serok Donald Trump bi awayekî eşkere bang kiribû ku derfeteke nû bi Sûrîyê bê dayîn.
Wilson eşkere kir ku serdana wî ya Sûrîyê xwedî girîngîyeke taybet bû, ji ber ku ew bi senatora Demokrat Jeanne Shaheen re beşdar bû, her wiha ew bi Serok Ehmed El-Şeriʼ re civîya û vê yekê derbarê rijdîya Sûrîyan li ser avakirin û jinûveavakirinê, bandoreke erênî li ser wî hişt.
Navborî amaje bi wê yekê jî kir ku Sûrîye xwedî şîyanên mezin e ji bo vejîna aborî û jinûveavakirinê, dîyar jî kir ku gelek avahî dikarin bên restorekirin û temamkirin, ku ev yek derfetên kar ên berfireh ji bo ciwanan peyda dike. Wî her wiha da zanîn ku welatên cîran xwesteka xwe ya ji bo beşdarbûna di jinûveavakirina Sûrîyê de nîşan didin.
Endamê Kongresa Amerîkî destnîşan kir ku welatê wî her hewldaneke ji bo parçekirina Sûrîyê red dike û bi yekîtî û serwerîya wê ya tam bawer e, tekez jî kir ku bidawîkirina hebûna bîyanî ya neqanûnî di nav axa Sûrîyê de gaveke bingehîn e ji bo pêkanîna aramîyê.
Endamê Komarî yê Kongresa Amerîkî, Joe Wilson bawerîya xwe bi şîyana gelê Sûrî ya ji bo derbaskirina zehmetîyan anî ziman û gotina xwe wiha qedand: “Sûrîye dikare bibe modelek ku di derbaskirina dîktatorîyê û avakirina paşerojeke ku tê de ewlehî, rûmet û hêvî serwer be, were şopandin.”
