Heseke-SANA
Cîgirê Parêzgerê Hesekê Ehmed El-Hilalî, tekez kir ku mafê vegerê bo ser ax û malê, mafekî resen e ku dewlet ji bo her welatîyekî Sûrî misoger dike, û divê ev veger ewle û rûmetdar, dûrî tevlîhevî, cudakarî an dûrxistinê be.
El-Hilalî di daxuyanîyekê de ji bo Rêveberîya Ragihandinê ya Hesekê roja Duşemê dîyar kir, ku vegera zêdetirî 400 malbatî bo gundewarê Serê Kanîyê hatiye dabînkirin, piştî girtina tedbîrên ewlehîyê yên pêwîst, li gel karên rakirina mîn û bermayîyên şer û vekirina rêyên sereke, û pêvajoyên lêgerîn û paqijkirinê li çend navçeyan hêj berdewam in da ku vegera hejmareke pirtir a niştecihan were ewlekirin.
Cîgirê Parêzger da xuyakirin ku ev veger pirên bawerîyê navbera xelkê heman herêmê de ava dike û pêkvejîyana aştîyane di nav wan de xurt dike, û di vê çarçoveyê de serdana şandekê ji koçberên Hesekê bo herêmên wan pêk hat, da ku li rewşê binêrin û bi xizmên xwe re bicivin, û ev pêngavek e ku em wê li ser rêya vegera pêwendî û bawerîyê di navbera pêkhateyên civaka me de giring dibînin.
Her weha got: “Ew kiryarên bûn sedema alozî, şikandin, êrîş û gurkirina fitneyê ku li Serê Kanîyê an Hesekê çêbûn, şermezarkirî ne û ji kokde nayên pejirandin “, û anî ziman ku nabe tirsa mirovan an nakokîyên wan bibin sedema êrîşên li ser mal û milkan, bi taybetî sazîyên dewletê, sembolên wê û alaya wê ya nîşana qurbanîyên gelê Sûrîyê ye.
El-Hîlalî destnîşan kir ku alîyên peywirdar dest bi standina tedbîrên qanûnî kirine, û li çend navçeyan hejmarek ji kesên ku alozî derxistine hatine girtin, û dê ti sistbûn hemberî çi kesê ku bixwaze fitneyê derxe an aştîya civakî tehdîd bike tune be, û dîyar kir ku dewlet heye, sazîyên wê bi berdewamî dixebitin, û ew dê xurtkirina amadebûna xwe, çalakkirina sazîyên xwe û çesipandina serwerîya qanûnê bidomîne.
El-Hilalî tekez kir ku ew nahêlin Hesekê bibe qada fitneyê, û piştrast kir ku dê xebat ji bo ewlehîya xelkê wê, yekîtî û aştîya wê ya civakî, û vegera her kesê ku dixwaze vegere ser axa xwe, vegereke ewle û rûmetdar, berdewam bike.
