Heseke-SANA
Rêveberîya Rewşên Awarte û Birêvebirina Karesatan li Parêzgeha Hesekê ligel Rêveberîya Çavkanîyên Avê li Parêzgehê, rêkar û amadekarîyên pêşwext ji bo kêmkirina metirsîyên lehîyan di zivistana bê de gotûbêj kirin, nexasim xebatên têkildarî baştirkirina herikandina ava baran û lehîyan û bilindkirina asta amadebaşîya wan deverên ku herî zêde rûbirûyî lehîyan dibin.
Rêveberê Rêveberîya Rewşên Awarte û Birêvebirina Karesatan Ebdilhelîm Şehab, di daxuyanîyekê de ji bo nûçegihanê SANAyê, duh Duşemê dîyar kir ku di hevdîtinê de mekanîzmayên cîbicîkirina karên vekirin û paqijkirina rêça Çemê Xabûrê li bajarê Hesekê hatin nirxandin; ku rêveberîyê tîmên pispor ji bo pişkinîna rêça çêm û destnîşankirina wan deverên ku pêdivîya wan bi paqijkirin û nûjenkirinê heye şandine, bi awayekî ku beşdarî baştirkirina herikbarîya avê û derxistina wê bibe û egera çêbûna lehîyan sînordar bike.
Şehab destnîşan kir ku rêveberîyê dest bi wergirtina hejmarek rêkarên pêşwext kiriye ji bo kêmkirina metirsîyên lehîyan û xurtkirina amadebaşîyê ji bo zivistana bê, ev jî di çarçoveya planên hikûmetê de tê ku armanca wan xweparastina ji metirsîyan û bersivdana zû ji bo wan e.
Her wiha da zanîn ku hejmarek rêkar dê li gundewarê parêzgehê werin cîbicîkirin, di nav de bilindkirina bendên axê û paqijkirina rêbar, pir û cobarên herikandina avê, nexasim li her du navçeyên Til Hemîs û Til Koçerê li gundewarê Qamişloyê, bi armanca dabînkirina rêyên guncav ji bo herikandina ava baran û lehîyan û rêgirtina li kombûna wan li deverên nizim û nêzîkî cihên xelkê û rêyan.
