Laziqîye-SANA
Tîmên rizgarkirinê yên Nav Avê yên Rêveberîya Rewşên Awarte û Birêvebirina Karesatan a parêzgeha Laziqîyê, piştî xebatên lêgerîn û şopandinê yên ku zêdetirî çar seatan li devera Perava Şîn berdewam kirin, cenazeyê keçeke heşt salî ku nûçeya wendabûna wê ji wan re hatibû, ji avê derxistin.
Fermandarê Operasyonên Rewşên Awarte û Birêvebirina Karesatan li Laziqîyê, Hesen Mihemed, di daxuyanîyekê de ji nûçegihanê SANAyê re îro Sêşemê dîyar kir ku odeya operasyonan agahîyek li ser wendabûna keçekê wergirtîye. Ji ber wê yekê Tîmên Rizgarkirinê yên Nav Avê yekser ber bi cihê bûyerê ve çûn, û li nav ava deryayê, perav û deverên derdorê dest bi xebatên lêgerînê kirin.
Mihemed amaje kir ku tîmên rizgarkirinê cenazeyê zarokê ji ava nêzîkî peravê derxist, û ji bo temamkirina karûbarên qanûnî û radestkirina wê ji malbatê re, bo nexweşxaneyekê hat veguhestin.
Mihemed bang li malbatan kir ku ji bo parastina ewlehîya zarokan û kêmkirina bûyerên xeniqînê, gava diçin peravan û deverên biav, pabendîyê bi rêkarên ewlehî û xweparastinê bikin, bi awayekî berdewam zarokên xwe bişopînin û wan bi tena wan nehêlin, û her wiha guh bidin rênimayên tîmên rizgarkirinê û parêzvanên peravan .
