Şam-SANA
Wezareta Ragihandinê ragihand: “Wê hûrgulîyên ku bi hevpeyvîna televîzyonî ya ku kanala ‘Şems’ê bi Serok Ehmed El-Şeri’ re pêk anîbû re çêbûne, her wiha biryara kanalê ya lêborîna ji bo neweşandina hevpeyvînê li ser bingeha nirxandinên wê yên sîyasî yên taybet, li gorî ku rêveberê wê yê giştî Êlî Nakozî eşkere kiriye; ku her wiha amaje bi asta bilind a azadîyê kir ku di hevpeyvînê de hebû û vekirîbûna Serok ji bo bersivdana hemû pirsên hatine kirin bêyî tu sînoran, şopand.”
Wezaretê di daxuyanîya xwe ya îro Çarşemê de tekez kir ku Serok El-Şeri’ tevî hebûna gelek kanalên navxweyî û navdewletî, kanaleke Kurdî hilbijart ji bo nîşandana ramanên xwe û agahdarbûna li ser geşedanên dawî, wekî tekezkirina pêgeh, rol û mafên Kurdan, û piştrastkirina ku têkilî bi wan re ji çarçoveya rêxistinan derbas dibe.
Wezaretê dîyar kir ku her çiqas ew hinek xalên ku kanalê di çarçoveya hincetên biryara xwe de anîne ziman fêm dike, lê ji alîyê pîşeyî û edîtorî ve tekez dike ku hebûna zextan an jî nerazîbûnên ne-edîtorî ne sedemeke rewa ye ji bo qedexekirina hevpeyvîneke ku di çarçoveyeke rojnamegerî ya pîşeyî de hatiye amadekirin, bi razîbûna her du alîyan û li ser bingeha rêzgirtina mafê gel ji bo dîtina nêrîn û helwestên cihêreng.
Wezaretê di berdewamîya daxuyanîya xwe de got: “Ji ber berpirsyarîya xwe ya parastina mafê raya giştî ji bo zanînê, û ji bo parastina bingehên pîşeyî û qanûnî yên karê ragihandinê, Wezareta Ragihandinê mafê xwe yê tam diparêze ku hevpeyvînê di ser platformên xwe yên fermî re biweşîne li gorî çarçoveyên qanûnî, ji ber ku ew materyaleke medyayî ya amadekirî ye û tu hincetên pîşeyî yan edîtorî ji bo veşartina wê tune ne.”
