Hikûmeta Sûrîyê daxuyanîya ku ji alîyê “Rêveberîya Xweser” ve di 17ê Rêbendana 2026an de hatibû derxistin, şopand; daxuyanîya navborî gelek çewtî û tawanbarkirinên ku armanca wan xapandina raya giştî ya navdewletî û tevlihevkirina dosyayan e, li xwe girtibû. Ji bo vê yekê, Hikûmeta Sûrîyê di bersiva xwe de li ser van îdîayan, redkirina xwe ya teqez ji bo her hewldaneke bikaranîna dosyaya terorê wekî kaxezeke fişara sîyasî yan ewlehî li hemberî civaka navdewletî nîşan dide, û van xalên li jêr zelal dike:
Hikûmeta Sûrîyê bi tundî hewldanên fişara ewlehî di dosyaya terorê de red dike, û tekez dike ku ew hişyarîyên di daxuyanîya “Rêveberîya Xweser” de derbarê zindanên rêxistina “DAIŞ”ê de hatine, tenê bikaranîneke sîyasî ya kaxeza terorê û meşandina cureyekî fişar û xwesteka ewlehî ye. Îsara li ser girêdana tevgerên sepandina qanûnê û vegerandina rewatîya dewletê bi metirsîya çalakkirina şaneyên terorê re, hewldaneke eşkere ye ji bo serûbinkirina rastîyan û gurkirina nakokîyan bi armanca hiştina desthilateke ku bi hêza çekan hatiye ferzkirin.
Hikûmeta Sûrîyê bi rêya sazîyên xwe yên leşkerî û ewlehîyê, amadebaşîya xwe ya tam ji bo pêkanîna erkên xwe yên di têkoşîna li dijî terorê de, di çarçoveya hewldanên navdewletî yên ji bo jinavbirina rêxistina “DAIŞ”ê û rêxistinên din ên terorîst, tekez dike. Her wiha dewleta Sûrîyê soz dide ku hemû navendên girtinê li gorî pîvanên navdewletî yên pejirandî ewle bike, û misogerkirina nerevîyana tu endamên girtî yên rêxistina “DAIŞ”ê û venegerîyana wan bo qadê dîsa, ev yek jî ji ber berpirsyarîya wê ya li hemberî ewlehîya niştimanî, ewlehîya herêmê û ewlehî û aştîya navdewletî tê.
Di vê çarçoveyê de, Hikûmeta Sûrîyê serkirdayetîya “HSD”ê ji encamên avêtina her gavên bêserûber ên wekî hêsankirina revîyana girtîyên rêxistina “DAIŞ”ê yan vekirina zindanan ji wan re wekî rêkarekî tolhildanê yan kaxezeke fişara sîyasî, hişyar dike. Berpirsyarîya rasterast a her binpêkirineke ewlehîyê di van zindanan de dê bikeve ser milê alîyê ku niha wan kontrol dike, û dewleta Sûrîyê dê bi her kiryareke bi vî rengî re wekî tawana şer û hevkarîya rasterast bi terorê re ya ku ewlehîya Sûrîyê û tevahîya herêmê dixe metirsîyê, reftar bike.
Her wiha Hikûmeta Sûrîyê tekez dike ku operasyonên wê yên leşkerî tenê ji bo vegerandina ewlehî û aramîyê, parastina sivîlan û rêgirtin li vegera terorê bi hemû şêweyên wê ne, û pabendbûna xwe ya tam bi rêgezên qanûna mirovî ya navneteweyî, parastina dezgehên girîng û misogerkirina mafên hemû Sûrîyan bêyî tu cudakarî, nû dike.
Hikûmeta Sûrîyê balê dikişîne ser wê yekê ku vegerandina dewletê bi sazîyên wê yên rewa û serwerîya qanûnê li ser tevahîya axa Sûrîyê, garantîya tekane û ya dawî ye ji bo bidawîkirina dosyaya rêxistina “DAIŞ”ê bi awayekî bingehîn, girtina dosyaya koçberî û derbederîyê, û jinûveavakirina aştîya civakî li ser bingehên dadperwerî, serwerîya niştimanî ya tam û hemwelatîbûna wekhev di navbera hemû Sûrîyan de.
