Şam – SANA
Berdevkê Wezareta Navxwe Nûredîn El-Baba tekez kir ku mafê xwepêşandan û derbirînê ji bo hemû Sûrîyan, bi xwîna milyonek şehîdê Sûrî ku Şoreşa Sûrîyeyê ya Mezin pêşkêş kir, misogerkirî ye. Her wiha dîyar kir ku Dewleta Sûrîyeyê garantora daxwazên hemû lawên gelê Sûrîyeyê ye û hişyarî da ku gel li pey bangên derve yên fîtneyê neçe.
Berdevkê Wezareta Navxwe bi rêya kanala xwe ya Telegramê got: Em îro li bajarê Himsê ne, û me ligel fermandarên Ewlekarîya Navxweyî çendîn ger di nava bajêr de pêk anîn. Serdanên me ji bo hejmarek ji şênîyên ku bûyerên xemgîn dîtine ji hemû pêkhateyan çêbûn. Têkilî bi wan re hat danîn û ew hatin ewlekirin.
El-Baba gotina xwe wiha domand: Mafê xwepêşandan û derbirînê ji bo hemû Sûrîyan bi xwîna milyonek şehîdê Sûrî ku Şoreşa Sûrîyeyê ya Mezin pêşkêş kir, misogerkirî ye. Wezareta Navxwe ji parastina vî mafî berpirsyar e û li ser heman dûrîyê ye ji hemû pêkhateyên Sûrî. Em şîretê li xelkê xwe dikin ku li pey bangên derve yên ku armanca wan fîtne û xirabkirina tevna civakî ye, neçin.
Derbarê kombûnên nerazîbûnê li hin deverên peravê, Berdevkê Wezareta Navxwe di daxuyanîyên ji bo kanala El-Ixbarîye El-Sûrîye re dîyar kir ku Hêzên Ewlekarîya Navxweyî ewlekarîya van kombûnan parastin ji bo rêgirtina li her bûyereke awarte ku alîyên ku propagandaya bêserûberîyê dikin, bi kar bînin.
Berdevkê Wezareta Navxwe da zanîn ku alîyên ku li herêmên peravê propagandaya bêserûberîyê dikin, hemû li derveyî welêt in û ji rastîya jîyana gelê me yê li peravê dûr in. Bal kişand ku gotina dirûşmên mezhebî di hin kombûnan de, armanca wan bangewazîyan nîşan dide.
Navborî got: Li ser vê bingehê, em bang li gelê xwe yê li peravê dikin ku li pey planên ku xwedîyên wan tenê dixwazin herêmê bixin nava gerîneka bêaramîyê, neçin.
Li dawîyê jî, Berdevkê Wezareta Navxwe piştrast kir ku Dewleta Sûrîyeyê garantora daxwazên hemû lawên gelê Sûrîyeyê ye û nîşan da ku nabe mirov bi rêya senaryoyên alozî û bangewazîyên ku gelê me yê peravê armancên xwedîyên wan dizane, reftarê bi van daxwazan re bike.
