Laziqîye-SANA
Bi zêdebûna şepêla vegera niştecîyan re bo gundên Cebel el-Ekrad yê li gundewarê Laziqîyê, niştecî tûşî pirsgirêkeke bingehîn tên ku aramîya wan a rojane têk dide; “nebûna firneyan”. Kêmbûna dijwar a peydakirina nan, dihêle ku bi hezarên kesên vegerîyayî berê xwe bidin rêbarên dirêj da xwe bigihînin deverên hawîrdorê xwe, her wekî “El-Dama, Cisir El-Şuxûr” û heta bi Laziqîyê jî, ev yek jî barê debara jîyanê û rûniştineke hêmin têk dide.
Frineyên wêranbûyî aramîya niştecihan têk didin
Serokê Komîteya navçeya Selmayê, Tahir Yûsif Ereb, da xuyakirin ku berî şer li herêmê du firneyên otomatîk hebûn, ku tevahîya pêdivîyên niştecihan pêk dianîn. Lê hilweşîna binesazîyê bû sedema girtina wan û nêzîkî deh gundan ji nan bêpar man.
Wekî din jî, Ereb bang li rayedarên peywendîdar kir ku leza vekirina firneya Selmayê bikin, ji ber bandoreke wê ya rasterast li ser xweşkirina rewşa debara jîyanê heye.
Serê pêşî nan… Lê rêya wê ji xewna vegerê dirêjtir e
Yek ji kesên vegerîyayî, Mistefa Ereb Axa, tekez kir ku kêmbûna nan dijwarîya herî sereke ye, dûre av, xizmetên tenduristî û perwerdeyê tên. Ehmed Mistefa Hisêno jî lê zêde kir ku piştî ku nan bi zehmetî ji deverên dûr tînin, ew bi neçarî li ser hev kom dibe û piştî çend saetkê têk diçe, loma wî xwest ku piştgirîya çakkirina binesazîyê duqat bibe.
Li alîyê din jî, li Cebel El-Ekrad, veger bi hejmara vekirina xanîyên jinûvekirî tenê nayê pîvan, belkû bi nanê germ ê li ser sifirê. Şixulandina firnê ne tenê pêdivîyek e, lê belê binemayekî jîyaneke birûmet e ku rih bi gundan de tîne û rûmeta xelkê û bêhna erda ku nayê jibîrikin, li wan vedigerîne.
