Hesekê-SANA
Rêveberê Têkilîyên Giştî di Rêveberîya Ragihandina Hesekê de, Mus’eb El-Hamidî, tekez kir ku vegera malbatên taxa Ezîzîyê ya Hesekê yên koçberbûyî bo malên wan, piştî zêdetirî deh salan ji koçberîyê, gaveke giring e li ser rêya xurtkirina aramîyê û komkirina malbatên ku mercên salên borî rê li ber vegera wan girtibû.
El-Hamidî di daxuyanîyekê de ji bo nûçegihanê SANAyê, duh Duşemê, dîyar kir ku vegera van malbatan bo malên wan, encama hewldan û xebatên Fermandarê Ewlehîya Navxweyî li parêzgeha Hesekê, Emîd Merwan El-Elî, û şopandina Cîgirê Parêzgarê Hesekê, Ehmed El-Hîlalî, û hevrêzkarîya li gel alîyên pêwendîdar bû. Her wiha tekez kir ku xebat berdewam in ji bo hêsankirina vegera malbatên din yên koçber û dabînkirina hewcedarîyên pêwîst ji bo vegera wan ewle û aram be.
Di heman daxuyanîyê de El-Hamidî bal kişand ser wê yekê ku vegera welatîyan bo malên wan ji parêzgeha Idlibê, di çarçoveya hewldanên hikûmetê de tê ku armanca wan dabînkirina vegera koçberan e bo herêm û malên wan li parêzgehên cuda cuda yên Sûrîyê, û xebata ji bo amadekirina mercên guncaw ji bo vê yekê, bi awayekî ku aramîya civakî xurt bike û beşdarîyê di vegera jîyana asayî de li herêmên ku rastî pêlên koçberîyê hatibûn bike.
El-Hamidî her wiha dîyar kir ku alîyên hikûmetê yên pêwendîdar berdewam dixebitin; rewşa malbatên vegerîyayî û naskirina pêdivîyên wan, û xebata ji bo çareserkirina zehmetîyên ku pêkan e rastî wan bibin dișopînin, da ku vegereke hêdî hêdî û aram misoger bibe û careke din beşdarîyê di çalakkirina jîyana civakî û xizmetguzarîyê de li herêm û taxên ku welatî vedigerinê bikin.
Her wiha piştrast kir ku vegera koçberan bo mal û herêmên wan yên resen, pêşîne ye di nav hewldanên li ser asta parêzgehên cuda cuda yên Sûrîyê de, ji ber giringîya wê di xurtkirina aramî, kûrkirina hevgirtina civakî, û vegerandina malbatan bo derdor û jîngeha wan ya xwezayî piştî salên ji dûrmanê.
