Heleb-SANA
Îro Pêncşemê, koma dawî ya şênîyên Efrînê yên ku li parêzgeha Hesekê û herêmên rojhilatê Firatê diman, vegerîyan malên xwe yên li gundewarê Helebê. Ev yek di çarçoveya hewldanên hikûmetê de tê ku armanc dike hemû malbatên koçber vegerîne herêmên wan ên resen.
Ev karwan, derdora 1000 malbatî li xwe digire û di nav tedbîrên ewlehî û rêxistinî de, ji bo misogerkirina gihîştina ewle ya şênîyan bo herêmên wan, bi serperiştîya Komîteya Serokatîyê ya ku bi hêsankirin û dabînkirina karwanên vegera dilxwazî hatiye erkdarkirin, bi silametî gihîşt cihê xwe.
Vegera Hezar Malbatî ji Hesekê bo Efrînê
Rêveberê Ofîsa Têkilîyan di Rêveberîya Herêma Efrînê de Mihemed El-Hesen, di daxuyanîyekê de ji bo SANAyê dîyar kir ku rêveberîya xwecihî bi temamî bi hemû sazî û alîyên peywendîdar re hevahengî kiriye ji bo pêşwazîkirin û birêvebirina karwanê ku nêzîkî hezar malbatî ji parêzgeha Hesekê li xwe digire.
El-Hesen spasîya xwe ji bo hewldanên Hêzên Ewlehîya Hundirîn di birêkxistina trafîka wesayîtan û hêsankirina gihîştina malbatan bo gund û deverên wan anî zimên. Her wiha di pêşkêşkirina alîkarîyên lojîstîkî, dabînkirina pêdivîyên bingehîn û bijîşkî, û navendên hewandina demkî ji bo malbatan yekser piştî gihîştina wan, pesnê rola berdewam a kadroyên Berevanîya Sivîl û Karûbarên Civakî da.
Ev karwan jî, wekî karwanê bejayî yê talîyê tê ku ji bo hêsankirina vegera Sûrîyên koçber ji herêmên Cizîrê û Rojhilatê Sûrîyê bo herêmên wan ên resen li gundewarê Helebê hatiye veqetandin, ku koma wan a yekem di meha Adara borî de bi rê ketibû.
