Hesekê-SANA
Serokê Desteya Giştî ya Dergeh û Gumrikan Quteybe Bedewî di dema hevdîtina xwe ya ligel Parêzgarê Hesekê Nûredîn Ehmed, rêyên xurtkirina hevkarîya di navbera desteyê û parêzgehê de, hêsankarîyên ku deste pêşkêşî bazirgan, pîşesaz û cotkaran dike, û her wiha tedbîrên ku armanca wan hêsankirina proseyên hawirdekirin û hinardekirinê û piştgirîkirina hilberîna niştimanî ye, gotûbêj kirin.
Desteya Giştî ya Dergeh û Gumrikan duh Pêncşemê êvarî li ser kanala xwe ya Telegramê dîyar kir ku di dema hevdîtinê de, projeyên ku deste dê ji bo geşepêdana dergehên sînorî yên li parêzgehê cî bi cî bike hatin pêşandan; di serî de nûjenkirina dergehê sînorî yê Qamişloyê, pêşxistina her du dergehên Til Koçerê (El-Ye’rubîye) û Sêmalkayê, ligel cîbicîkirina projeyên sererastkirin û nûjenkirina rêyên ber bi wan ve bi hevahengîya ligel Wezareta Veguhastinê, bi awayekî ku beşdarî baştirkirina girêdana lojîstîkî û hêsankirina tevgera bazirganî û veguhastinê bibe.
Parêzgar giringîya van projeyan di piştgirîkirina geşepêdana aborî ya li parêzgehê de tekez kir, û berdewamîya hevkarî û hevahengîyê ji bo cîbicîkirina wan projeyên ku xizmeta parêzgehê û aborîya niştimanî dikin, dûpat kir.
Serdana Dergehê Qamişloyê yê ligel Tirkîyê
Piştî civînê, serokê desteyê serdana dergehê sînorî yê Qamişloyê yê ligel Tirkîyê kir û ji nêzîk ve agahdarî ketwara teknîkî û xizmetguzarî ya dergehî bû, û got ku divê dest bi amadekirina planên pêwîst ji bo nûjenkirina binesazîyê û temamkirina karûbarên teknîkî were kirin, wek amadekarîyekê ji bo jinûvevekirina dergehî û xistina wî di xizmetê de di qonaxa bê de.
