Siwêda – SANA
Parêzgarê Siwêdayê Mistefa El-Bekûr tekez kir ku ew êrîşa ku li ser Şirketa Giştî ya Ava Vexwarinê û Kanalîzasyonê li parêzgeha Siwêdayê, sinçên parêzgehê raber nake.
El-Bekûr di daxuyanîyekê de ku parêzgeha Siwêdayê îro Şemîyê li ser kanala xwe ya Telegramê weşandiye, got: “Rojên borî şahidîya êrîşên çeteyên derqanûnî li ser şirketa avê, astengkirina karê wê û gefxwarina li ser milkên wê kirin. Ev reftar jî bi sinçên parêzgehê re nagunce.”
El-Bekûr di daxuyanîyê de berpirsyarîya rasterast xiste stûyê civaka herêmî û aqilmendan ji bo parastina van sazîyan, û bêdengbûna li hember van kiryaran wekî pişkdarîyeke veşartî di têkbirina wan de hesiband.
El-Bekûr: Êrîşa li ser Şirketa Avê Êrîşa li ser Civakê ye.
Wî tekez kir ku parastina cihên giştî erkekî tevahî ye û tu kes jê nayê efûkirin, û destdirêjîya li ser şirketa avê êrîşeke li ser mafê tevahîya civakê ye. Her wiha dîyar kir ku ji civakê helwesteke zelal û eşkere ku hêjayî dîroka Siwêdayê be tê xwestin, û da zanîn ku dê çete bêyî tu nermî werin şopandin.
El-Bekûr bal kişand ser wê yekê ku saz’yên giştî ne milkê tu kesî ne û ne cihê safîkirina hesaban in, belkû ew ji bo xizmetkirina mirovan in, û got: “Em rê nadin ku ev der veguherin qada alozî yan şantajê.”
