Mêrdîn – SANA
Di çarçoveya pêşbirkên nîqaşên çandî de yên ku ji hêla Wezareta Perwerdeya Neteweyî ya Tirkîyê ve têne lidarxistin, xwendekara Kurd a Sûrî Arya Silêman di pêşbirka “Modela Neteweyên Yekbûyî” (MUN) de, ya ku li parêzgeha Mêrdînê hat lidarxistin, xelata “Nûnerê Cîyawaz” (Distinguished Delegate) bi dest xist.
Li gorî nûçeya ku li ser rûpela Instagramê ya Dibistana Amadeyî ya “Mardin Anadolu Lisesi” -cihê ku Arya lê dixwîne- hatiye weşandin, xwendekara wan di warê nîqaşên çandî de ev xelat wergirtiye. Dibistanê di daxuyanîya xwe de got: “Xwendekara me Arya Silêman bi bidestxistina xelata ‘Nûnerê Serkeftî’ di konferansa Modela Neteweyên Yekbûyî (MUN) de, ya ku li ser asta Midûrîyeta Perwerdehîya Neteweyî ya Mêrdînê/ Navçeya Artukluyê hat lidarxistin, serê me bilind kir.”
Dibistanê ji ber serkeftina wê di temsîlîyeta dîplomatîk de di wê modela Neteweyên Yekbûyî de, pîrozbahî li Aryayê kir û wiha got: “Em xwendekara xwe ji ber çareserîyên wê yên dîplomatîk ji bo pirsgirêkên cîhanî û temsîlîyeta wê ya serkeftî pîroz dikin, û hêvîya berdewamîya serkeftinê ji bo wê dixwazin.”
Di daxuyanîyeke taybet de ji bo ajansa SANAyê, Silêman got: “Divê mirov li benda raman û planan nemîne da ku karekî bikêrhatî bike, lê belê divê ew bi xwe li gorî ezmûn, agahî û xwendinên xwe tiştên nû biafirîne.”
Hêjayî gotinê ye ku Arya Silêman xwendekareke Sûrî ye, di sala 2009an de li bajarê Qamişloyê ji dayik bûye. Ew ji sala 2014an ve bi malbata xwe re li Tirkîyê dijî û niha xwendekara qonaxa amadeyî ye. Arya ji dema dibistana seretayî ve bi xwendinê û pirtûkan re têkildar e û di warê nîqaşên çandî de serkeftî ye. Piştî serkeftina wê di pêşbirkên Mêrdînê de, wê mafê beşdarbûna pêşbirkên çandî yên li Enqereya paytext bi dest xist, ku biryar e di meha Hezîrana bê de werin lidarxistin.
