Şam-SANA
Di qadeke girtî de ku ji 50 metreyên çargoşe derbas nabe, gera hilberînê ya cuda ji her projeyeke çandinîyê ya klasîk diqewime; li vir li şûna tov û avê, paşmayîyên organîk ên hilweşîner tên bikaranîn, da ku piştî 40 rojî tenê, alîkên bi proteînê dewlemend û gubreyên organîk ên bi kalîteya bilind werin berhemanîn.
Ev kurtasîya ezmûna xwedîkirina “Mêşa Serbaz a Reş” li Sûrîyê ye, ku berîya neh salan wekî ramaneke kesî dest pê kir û îro veguherî yekemîn projeya bi molet a vî cureyê li Sûrîyê, û di nav projeyên pêşîn ên xwedî-molet de li cîhana Erebî cih girt.
Xwedîyê projeyê Rebî` Ezherî ji ajansa “SANA”yê re ragihand ku ramana projeyê di dema mayîna wî ya li Malezyayê de çêbûye; li wir li ser tecrubeyên perwerdekirina cotkaran û alîyên pêwendîdar di warê xwedîkirina vê kêzikê de agahdar bûye.
Ezherî piştî vegera xwe ev ezmûn veguhast Sûrîyê, bi sûdgirtin ji guncawbûna keşûhewaya nevçeyî û ji ber ku ev kêzik jixwe di jîngeha Sûrîyê de bi awayekî xwezayî heye.
Nehênîya berhemdarîya aborî ya projeyê, li gorî Ezherî, di veguherandina paşmayîyên bêqîmet de ye bo madeyên xam ên bêpere yan bi lêçûneke kêm; da ku nerxê madeyên xam ji heqê veguhestina wan zêdetir nebe.
Kurmik van paşmayîyan di nava 20 rojan de dixwin, berîya ku bigihîjin qonaxeke guncaw da ku piştî ziwakirinê wekî alîkê werin bikaranîn.
Proje di destpêka xwe de hewcedarî bingehînên mezin nîne; li gorî Ezherî, mirov dikare di qadeke girtî de ku ji 50 metreyên çargoşe dest pê dike û dikare were berfirehkirin, dest bi kar bike.
Her wiha pêwîst e pileya germê di navbera 25 û 27 pileyî de be, nemî û hewayeke guncaw hebe, ligel hewzên xwedîkirinê û alavên komkirina kurmikan û çareserkirina paşmayîyan.
Qonaxa yekem dikare ji hêla tîmeke ji du heta sê kesan ve were birêvebirin.
