Şam-SANA
Semînera çandî ya ku îro di bin çavdêrîya Rêveberîya Çandê ya Şamê de û ji hêla Navenda Çandî ya Erebî li Mezzeyê ve bi sernavê (Çand û Gotara Nefretê) hat lidarxistin, bal kişand ser rola medya û rewşenbîran di rûbirûbûna gotara nefretê û sînordarkirina belavbûna wê de.
Xwendekarê xwendina bilind di beşa Felsefeyê de li Zanîngeha Şamê, Îbrahîm El-Hemed, li ser kokên dîrokî yên gotara nefretê rawestîya û ji pirsa ‘gelo nefret li nik mirov xisleteke zikmakî ye yan jî tê wergirtin’ dest pê kir.
Dr. Xedîr Îsmaîl, mamosteyê rexneya nûjen li beşa Zimanê Erebî li Zanîngeha Şamê, hişyarî da li ser gotara nefretê ku yek ji dîyardeyên herî xeternak ên alozîya civakî tê hesibandin û di zimanê axaftinê, nîşan, îşaret û naverokên medyayî de xwe dide der.
Her wisa, nivîskar û rexnegir Samir Mensûr behsa rêbazên rûbirûbûna gotara nefretê û pêwîstîya hevalbendîya desthilatê bi rewşenbîr û medyayê re kir, ji bo rawestandina xwedîyên van gotaran û dadgehkirina wan û piştgirîya rewşenbîr û oldarên rastîn.
Helbestvan û rexnegir Emîr Semawî ji hêla xwe ve bang li her nivîskar û rewşenbîrî kir ku gotara xwe beraqil bike, balê bikişîne ser qencîyan û têgehên hezkirin, heq, xêr û dadmendîya civakî di nav hemû mirovan de biçîne. Di heman demê de, nivîskar û çîroknivîs Ebdullah El-Nefax di axaftina xwe de girîngîya jinavbirina gotara nefretê tekez kir.
Semîner bi helbestên helbestvan Ayişe Birêkat, Qasim Ferehat û her du xortên ciwan Umer Orfelî û Mihemed Tariq El-Fera bi dawî bû. Mijarên helbestan li ser pêwîstîya hembêzkirina cudahîyan û dûrketina ji her tiştê ku civakê ji hev cihê dike, rawestîyan.
