Enqere – SANA
Îro Sêşemê “Lûtkeya Anadolê ya Aborîya Bajaran” li parêzgeha Dîlokê (Gazîentab)ê ya li başûrê Tirkîyê dest pê kir. Ev lûtke bi beşdarîya Wezîrê Aborî û Pîşesazîyê Mihemed Nîdal El-Şear û Wezîrê Bazirganîyê yê Tirkîyê Umer Bolat, ligel berpirs û nûnerên sektora karsazîyê yên her du welatan, ji bo gotûbêjkirina asoyên hevkarîya aborî û xurtkirina hevparîyên veberhênan û geşepêdanê tê lidarxistin.
Karên lûtkeyê, yên ku ji alîyê Zanîngeha Gazîentabê ve li Navenda Kongre û Hunerê ya “Mavera”yê tên mêvandarkirin, bi nîşandana belgefîlmekî li ser têkilîyên dîrokî yên di navbera Gazîentab û Helebê de û rola wan wekî du navendên bazirganî yên li ser Rêya Herîrê, dest pê kirin.
Wezîr El-Şear di gotarekê de di dema vekirina lûtkeyê de tekez kir ku Tirkîye hevparekî asayî yê Sûrîyê ye, û tiştê her du welatan bi hev ve girê dide ne tenê dîrok, ol û şaristanî ye, belkî “çarenûseke jêneger” e, û bang li alîyê Tirkî kir ku bankan li Sûrîyê veke.
Ji alîyê xwe ve, Wezîrê Bazirganîyê yê Tirkîyê Umer Bolat careke din tekezî li ser piştgirîya Enqereyê ji bo Şamê di hemû waran de kir, û bal kişand ser wê yekê ku qebareya bazirganîya di navbera her du welatan de ji 3 mîlyar dolarî derbas bûye, bi armanca ku di demeke nêz de bigihîje 5 mîlyar dolarî, û heta destpêka dehsala çaremîn a sedsala niha bigihîje 10 mîlyar dolarî.
