Rîbat-SANA
Wezîrê Derve û Koçberan ê Sûrîyê Es’ed Hesen El-Sêbanî tekez kir ku têkilîyên Sûrîye û Mexribê dîrokî ne û got: “Em helwesta mirovî, exlaqî û sîyasî ya birûmet ku serokatîya Mexribê di piştgirîya daxwazên gelê Sûrîyê di 14 salên borî de nîşan daye, ji bîr nakin.”
Wezîrê Derve yê Mexribê Nasir Borîta, di konferanseke rojnamevanîyê de ligel Wezîrê Derve û Koçberan Es’ed Hesen El-Şeybanî ragihand:
Em ê bibin şahidê vekirina balyozxaneya Sûrîyê li Mexribê, wekî belgeyekê li ser vegera têkilîyan bo rewşa asayî piştî rawestana wan a ji deh salan zêdetir.
Şahnişîna Mexribê bi rêberîya Şah Mihemedê Şeşem, her dem di piştgirîya daxwazên gelê Sûrîyê yên ji bo azadî û rûmetê de zelal bûye, û her wiha di piştgirîya serwerîya Sûrîyê û yekparçebûna axa wê de xwedî helwesteke zelal bûye.
Gavên sîyasî, ewlehî, aborî û yasayî yên ku li Sûrîyê hatine avêtin, welat ber bi aramîyê ve dibin û wê ji qonaxa tarî ya ku bi salan tê de dijîya, derdixin.
Em piştgirîya xwe dûpat dikin û pêşwazîya hemû rêkarên ku bi serokatîya Serok Ehmed El-Şeri’ hatine girtin dikin da ku veguhastina sîyasî li Sûrîyê bi ser keve, tevî rewşên herêmî û şert û mercên aloz.
Wezîrê Derve û Koçberan Es’ed Hesen El-Şeybanî di konferanseke rojnamevanîyê de ligel Wezîrê Derve yê Mexribê:
Têkilîyên Sûrî-Mexribî dîrokî ne. Em helwesta mirovî, exlaqî û sîyasî ya birûmet a ku rêberîya Şahnişîna Mexribê di piştgirîya daxwazên gelê Sûrîyê di 14 salên borî de girtibû ser xwe, ji bîr nakin.
Em spasîya Mexribê dikin ji bo vegerandina bilez a têkilîyên sîyasî piştî rûxandina rejîmê. Yekemîn peywendîya di navbera me de 20 rojan piştî rizgarkirinê pêk hat, û me wê demê tekezî li ser pêwîstîya domandina têkilîyan kir.
Em dê îro balyozxaneya Sûrîyê li Şahnişîna Mexribê vekin, û em li benda serdana Wezîrê Derve yê Mexribê bo Şamê ne da ku balyozxaneya wê li wir veke.
Me li ser rêyeke berfireh ji bo têkilîyên her du welatan li hev kir ku ji asta sîyasî li ser asta her du wezaretan dest pê dike û derbasî alîyên aborî, perwerdehî û bazirganî jî dibe.
Me li ser avakirina encumena karasazên hevbeş di navbera her du welatan de li hev kir, da ku em mifayê ji ezmûna serkeftî ya Mexribê di gelek sektoran de wergirin.
