Waşington – SANA
Serokê Amerîkî Donald Trump tekez kir ku welatê wî dixwaze Sûrîye bibe welatekî serkeftî, ji ber ku ew beşekî bingehîn û girîng ê Rojhilata Navîn e. Wî destnîşan kir ku Serok Ehmed El-Şeri’ xwedî wê şîyanê ye ku vê yekê bi dest bixe.
Di daxuyanîyekê de ji rojnamevanan re îro li Koşka Spî, Trump got: “Ez gihiştim peymanekê bi Serok El-Şeri’ re. Ew rêberekî pir bihêz e, ji cihekî dijwar tê, û mirovekî xweragir e. Min jê hez kir, ez pê re li hev dikim, ew Serokê nû yê Sûrîyê ye, û em ê her tiştî bikin da ku Sûrîye serkeftî bibe, ji ber ku ew beşek ji Rojhilata Navîn e, û niha aştî li Rojhilata Navîn heye, cara yekem e ku mirov vê yekê bi bîr tînin”.
Trump wiha lê zêde kir: “Sûrîye beşekî mezin û pir girîng ê Rojhilata Navîn e. Eger em li Sûrîyê di nav salan de binêrin, em ê bibînin ku bijîşk, parêzer û gelek zîrek tê de hebûn. Ew cihekî hêja û bi gelekî mezin e, û em dixwazin wê serkeftî bibînin, ligel Rojhilata Navîn a mayî. Bawerîya min heye ku Serok El-Şeri’ dê karibe erkê xwe bi cih bîne, bê guman”.
Trump domand: “Em dixwazin Sûrîye bibe dewleteke pir serkeftî, û ez bawer dikim ku ev rêber dikare vê yekê bi dest bixe. Ez bi rastî jî vê yekê dipejirînim. Ew bi Tirkîyeyê re baş li hev dike, û bi Serok Recep Tayyip Erdogan re jî, ku ez wî wek rêberekî mezin dibînim. Ew piştgirîyeke mezin dide tiştên ku li Sûrîyê diqewimin. Divê em bihêkin Sûrîye bi ser keve. Ez bawer dikim ku kar baş diçin, û em bi Îsraîlê re jî dixebitin ji bo baştirkirina têkilîyan bi Sûrîyê re, û bi her kesî re”.
Serok El-Şeri’ berê di Koşka Spî de civîneke gotûbêjkirina fermî bi Serokê Amerîkî Donald Trump re pêk anîbû. Di civînê de, awayên xurtkirina têkilîyên dualî yên Sûrî-Amerîkî, pêşxistina hevkarîyê di warên cuda de, ligel gotûbêjkirina hejmarek mijarên herêmî û navdewletî yên hevpar, hatin nirxandin.
