Heleb-SANA
Parêzgarîya Helebê ragihand ku her du dergehên mirovî yên El-Ewarid û Kolana El-Zihûr, ji bo dabînkirina derketina welatîyên ku dixwazin ji taxên Şêx Meqsûd û Eşrefîyê derkevin, hatine vekirin. Ev dergeh bi hevrêzîya bi Artêşa Erebî ya Sûrî re, ji saet 10:00ê sibehê heta 01:00ê nîvro vekirî ne.
Parêzgarîyê dîyar kir ku ev biryar li ser bangewazîya malbatên dorpêçkirî hat standin, piştî ku rêxistina HSDê rê li ber derketina gelek kesan girt û hewl da sivîlan wekî mertalên mirovî bi kar bîne.
Her weha tekez kir ku vekirina van her du dergehan bi mebesta veguhestina sivîlan ber bi deverên ewle yên di hundirê bajarê Helebê de ye. Ji alîyê xwe ve, Desteya Operasyonan a Artêşa Erebî ya Sûrî hişyarî da rêxistina HSDê ku welatîyan di dema derketina wan de bi rêya dergehên ragihandî neke armanc, û destnîşan kir ku artêş ji bo ewlehîya wan dixebite.
Rêxistina HSDê bi topbaran û çekên giran armancgirtina taxên Helebê didomîne. Di encama van êrîşan de di rojên borî de leşkerekî artêşê şehîd ket, pênc sivîlan jîyana xwe ji dest dan û bi dehan kesên din jî birîndar bûn. Her wiha zîyanên mezin gihîştin binesazîyê, Nexweşxaneya Helebê ya Nexweşîyên Hinavê ji xizmetê derket û pêleke mezin a koçberîyê çêbû.
Hikûmeta Sûrîyê tekez kir ku ev tedbîr tenê ji bo parastina ewlehî û can û malên sivîlan hatine standin. Hikûmetê bang kir ku komên çekdar werin derxistin û sivîl ji deverên pevçûnan werin dûrxistin, û tekezî li ser serwerîya dewletê, yekparçeyîya xaka wê û dabînkirina ewlehî û rûmeta hemû welatîyan kir.
