Waşington-SANA
Kompanya “Meta”yê destpêkirina taybetmendîyên nû ji bo alîkarê xwe yê zîrekîya destkird ragihand, ku rê dide wî ku hejmarek erkan bi şêweyekî serbixwetir pêk bîne, bi rêya têgihiştina pêdivîyên bikarhêner û çarçoveya bikaranîna wî, û pêşkêşkirina xizmetên demdemî bêyî hewcedarîya dubarekirina fermanan, di pêngavekê de ku armanca wê xurtkirina şîyanên alîkarên zîrek ên kesane ye.
Malpera “The Verge”yê ya teknolojîyê di raporeke xwe ya ku duh Şemîyê weşandiye de, dîyar kir ev nûkirinên alîkarê “Meta AI”yê, xwe dispêrin modela “Muse Spark 1.1″ê. Ev yek şîyaneke mezintir dide wî ji bo pêkanîna erkên berfireh; wekî plansazî, lêgerîn û bicihanîna hin operasyonan bi şêweyekî serbixwetir, ligel kêmkirina hewcedarîya destwerdana berdewam a bikarhêner.
“Meta”yê ronî kir ku guhertoya pêşketî ya alîkarê wê yê zîrek ji bo têgihiştina çarçoveya bikarhêner û pêkanîna erkên dîyarkirî bi awayekî otomatîk hatiye sêwirandin, di nav wan de amadekirina kurteberhemên rojane yên bûyeran, danîna planên heftane yên xwarinê, û şopandina mijarên herî navdar (trend), ligel erkên din ku dikarin li gorî pêdivîyên her bikarhênerekî werin amadekirin.
Kompanyê tekez kir ku bikarhêner dê kontrola tam li ser awayê têkilîya xwe ya bi sîstemê re biparêzin, her wisa bal kişand ser berdewamîya peydakirina bijarteyan ji bo axaftinên taybet bi rêya moda gerana veşartî, bi awayekî ku di xurtkirina astên nepenîyê de di dema bikaranîna xizmetê de dibe alîkar.
Ev geşedan di bin sîya hevrikîya bilez a di navbera kompanyên mezin ên teknolojîyê de ji bo berfirehkirina bikaranîna zîrekîya destkird tê, hevdem ligel zêdebûna girîngîdana bi danîna rêzikên ku hevsengîyê di navbera nûjenî û parastina nepenîya bikarhêneran de çêdikin.
