New York-SANA
Nûnerê Daîmî yê Sûrîyê li Neteweyên Yekbûyî Îbrahîm Ulebî tekez kir ku Sûrîye ne dibe dergehek ji bo çekên neyasayî, ne qada yekalîkirina nakokîyên herêmî ne jî xala destpêkirinê ji bo gefxwarina li ewlehîya welat û gelên herêmê.
Ev yek îro Sêşemê di dema rûniştina Encumena Ewlehîyê ya Navneteweyî de li New Yorkê ji bo gotûbêjkirina geşedanên herî dawî yên li Sûrîyê hat.
Ulebî dîyar kir ku Encumenê bi salên dirêj ji bo gotûbêjkirina rewşa li Sûrîyê ya ku di bin kavilan de bû civîn pêk anîn, lê îro ew tîmeke Berevanîya Sivîl dişîne Venezuelayê ji bo beşdarîya di karên lêgerîn û rizgarkirinê de ji bo kesên di bin kavilan de asê mane.
Ulebî di berdewamîya axaftina xwe de bal kişand ser wê yekê jî ku Sûrîye qada pevçûnan bû, lê îro vedigere ku bibe pireke ku parzemînên cuda cuda yên cîhanê bi hev ve girê dide, ku ev yek berî çend rojan li Waşingtonê di îmzekirina du memorandumên hevtêgihiştinê ligel Iraqê û hevbendîyeke kompanyên navneteweyî de ji bo nûjenkirina xeta neftê ya Kerkûk-Banyasê hat şênberkirin, di gavekê de ku rola Sûrîyê wek navendeke herêmî ya enerjîyê û pireke hevkarî û geşbûnê tekez dike.
Ulebî her weha zelal kir ku Encumena Gel di vê mehê de rûniştina xwe ya yekem pêk anî, û di bin qubeya wê de jin û mêrên Sûrî ji parêzgeh, pêkhate, ezmûn û çînên cuda cuda yên civakê li hev civîyan. Her wisa Dadgeha Destûrî ya Bilind ji heft endaman hat avakirin ku du jin di nav wan de ne, da ku bi vê yekê stûnên bingehîn ên avakirina sazûmanî di qonaxa veguhêz de temam bibin.
Ulebî bal kişand ser wê yekê ku Wezareta Geştyarîyê îro ragihand ku welat di nîveka yekem a îsal de pêşwazîya 3.5 mîlyon kesî kiriye, di demekê de ku hejmara geştyarên bîyanî bi rêjeya %484 zêde bûye, ku ev nîşaneyên bawerîyê ne bi welatekî ku pêgeha xwe li ser nexşeya cîhanê ji nû ve bi dest dixe.
Derbarê malbatên qurbanîyên bûyerên Siwêdayê de, Ulebî got: “Em ji malbatên qurbanîyên bûyerên Siweydayê re tekez dikin ku pêvajoya lêpirsîn û cezakirina berpirsên binpêkirinên ku pêk hatine dest pê kiriye. Siweyda di dilê Sûrîyê de ye û parastina rûmeta xelkê wê bi hemû pêkhateyên wan erkekî niştimanî yê jêneger e, misogerkirina vegera koçberan bo malên wan û parastina mafê xwendina zarokên wan jî di nav de ye. Her wisa em tekez dikin ku Sûrîye di rêça dadwerîya veguhêz de ber bi pêş ve diçe.”
Ulebî li dawîyê dîyar kir ku Şam li bendê ye ku mêvandarîya Sekreterê Giştî yê Neteweyên Yekbûyî bike, di serdaneke ku ji stasyoneke protokolî pir dûrtir e, belkî şahidekî zindî ye li ser guherîneke dîrokî ku jin û mêrên Sûrî bi îrade û qurbanîdanên xwe çêkirine. Ulebî careke din tekez kir ku Sûrîye ne dibe dergehek ji bo çekên neyasayî, ne qada yekalîkirina nakokîyên herêmî û ne jî dibe xala destpêkirinê ji bo gefxwarina li ewlehîya welat û gelên herêmê.
