Doha – SANA
Wezîrê Karên Derve û Koçberan Es’ed Hesen El-Şeybanî tekez kir ku tiştê di salekê de piştî serkeftina şoreşê pêk hat, bawerîya Sûrîyan li wan vegerand. Her wiha dîyar kir ku vê yekê wêneyekî zelal gihand cîhanê derbarê şîyana vî gelî li ser derbaskirina demborîyê û çûna ber bi siberojê ve bi bawerîyeke mezin û vîneke xurt, tevî astengîyan û mîrata giran a ku rejîma hilweşîyayî li pey xwe hiştiye.
El-Şeybanî axaftina xwe domand û got: “Her hikûmeteke bi dilsozî kar bike dê gelek tiştan pêk bîne tevî kêmîya derfetan.” Bal kişand ser wê yekê ku serkeftinên hatine bidestxistin bi piştevanîya gelê Sûrîyê û sekinîna dostan li kêleka Sûrîyê pêk hatin.
El-Şeybanî destnîşan kir ku rewşa jîyanî û aborî hîn jî ji ber bandorên cezayan xasma yasaya Qeyserê, dinale.
El-Şeybanî got: “Hikûmeta Sûrîyê di sala borî de asteke mezin a gihîştin, aqilmendî û dîplomasîyê nîşan da. Her wiha ezmûna Sûrîyê di nava salekê de piştrast kir ku ew bêtir aqilane û dîplomatîk e û di komkirina piştevanîyeke berfireh ji welatên Erebî, bîyanî û Ewropî de bi ser ket.”
Derbarê jinûveavakirinê de, El-Şeybanî dîyar kir ku Sûrîya îro bala xwe dide ser jinûveavakirin û bihêzkirina pêşketina aborî bi rêya derfetên veberhênanê yên berfireh.
Wezîrê Karên Derve bal kişand ser wê yekê ku wêneyê Sûrîyê di nava salekê de bi awayekî bingehîn guherîye; piştî ku wekî çavkanîyeke gefê dihate wênekirin, îro bûye mînakek ji bo îlham û serkeftinê. El-Şeybanî tekez kir ku civaka navdewletî dest bi tevgera bi Sûrîyê re wekî şirîkekî çalak kiriye, û gelê Sûrîyê êdî bi çavê hêvî û bawerîyê li paşerojê dinêre.
Derbarê sîyaseta dagirkerîya Îsraîlê li hember Sûrîyê, El-Şeybanî wiha got: “Pirsgirêkên herî dîyar ên niha sîyasetên Îsraîlî ne ku hewl didin aramîyê li Sûrîyê têk bibin.”
El-Şeybanî axaftina xwe bi tekezkirina li ser wê yekê bi dawî kir ku gelê Sûrîyê sermayeya rasteqîn a dewletê ye û hikûmet ji nav vî gelî derketiye û êşa wî jîyaye.
Hêjayî gotinê ye ku duh li paytexta Qeterê Dohayê çalakîyên gera 23yan a Foruma Dohayê di bin dirûşmeya “Çesipandina Dadwerîyê: Ji Sozan ber bi Rastîya Hestpêkirî” dest pê kir. Ev forum bi beşdarîyeke berfireh ji serokên dewletan, wezîr, pisporên navdewletî û nûnerên payebilind ji zêdetirî 150 welatên cîhanê du rojan berdewam dike.
