Kanbera – SANA
Lêkolîneke nû derxist holê ku bi rêya şirovekirina deng bi alîkarîya hişê çêkirî û tenê bi tomarkirineke dengî ya kurt ku 20 çirkeyan derbas nake, mirov dikare nîşanên destpêkê yên nexweşîya şekir a cureyê duyemîn destnîşan bike.
Îro Çarşemê, Rojnameya “The Mirror” a Brîtanî li ser zarê lêkolîna ku ji alîyê zanyarên Zanîngeha “RMIT” a Awistralî bi hevkarîya şirketa “Thymia” ya teknolojîyên pizîşkî ya Brîtanî ve hatiye amadekirin ragihand: Modeleke hişê çêkirî kariye bi analîzkirina tomarkirineke dengî ya 20 çirkeyan, metirsîya tûşbûna bi vê nexweşîyê bi rêjeya dirustîya %80 dîyar bike; her wiha di berawirdkirina ligel pişkinînên xwînê de ev rêje gihiştiye %82an.
Ev teknolojî xwe dispêre fêrkirin û perwerdekirina modeleke hişê çêkirî li ser tomarkirinên dengî yên berfireh, da ku guhertinên gelekî hûr ên di deng de bibîne ku dibe pêwendîya wan bi nexweşîya şekir re hebe; wekî girtîbûna deng, taybetmendîyên koka deng û awayê hilmstandinê di dema axaftinê de.
Li gorî encamê, ew kesên ku nîşanên bilind li cem wan dîyar dibin, ji bo tekezkirina rewşa wan ber bi pişkinînên xwînê ve tên arastekirin.
Ev lêkolîn li ser nêzîkî 30 hezar kesî hat ceribandin û wekî yek ji mezintirîn lêkolînan tê hejmartin ku li ser bikaranîna deng ji bo naskirina nîşanên nexweşîya şekir hatiye kirin.
Li alîyekî din, şirketê destnîşan kir ku bikaranîna vê teknolojîyê di kontrola destpêkê de dikare bibe sedema kêmkirina hewcedarîya pişkinînên xwînê, tevî ku berî pejirandina wê li ser asteke berfireh hîn jî pêdivî bi tekezkirina klînîkî heye.
