Washington – SANA
Lêkolîneke nû ku ji alîyê lêkolînerên Zanîngeha Illinois Urbana-Champaign a Amerîkayê ve hat encamdan, dîyar kir ku xwarina fîberên garisê “xav” ên di avê de dihelin, dibe ku têkildarî baştirbûna baldarîya mirovan û guhertina mîkrobîyoma rûvîyan be. Ev yek nîşan dide ku bandora fîberên xwarinê li ser tenduristîya rûvîyan û xebitîna mejî heye.
Kovara zanistî «The Journal of Nutrition» di raporeke xwe ya nû de, dîyar kir ku lêkolîn li ser 42 mirovên saxlem ên temenên wan di navbera 45 û 75 salan de bûn hatin encamdan. Kesên beşdar ketin ezmûneke dutaq ji koranî ve; di wê ceribandinê de her yekî seranserî 4 hefteyan 18 gram fîberên garis ên di avê de dihilin, xwarin, paşê 4 hefteyên din madeyeke kontrolê ku bêbandor e wergirtin.
Encaman nîşan da ku xwarina fîberên garis, bû faktera çêtirbûna leza bersivdanê di dema ceribandinên ji bo pîvana karîna hişyarîyê û guhnedana tiştên baldarîya mirov belav dikin. Her wiha bû sedema zêdebûna çarqatî ya cureyekî bakteryayên rûvîyan ku bi navê «Parabacteroides» tê nasîn.
Lêkolîneran anî ziman ku analîzan piştrast nekirye ku guherînên mîkrobîyoma rûvîyan sedema rasterast a çêtirbûna xebitîna mejî bûn, lê belê wan nîşan da ku îhtimala hebûna têkilîyekê di navbera xwarina fîberên garis û hinek guherînên di bakteryayên rûvîyan û xebitîna hiş û baldarîyê de heye.
Lêkolîn nîşan dide ku pêkan e bandora erênî ya fîberên xwarinê li ser danûstandina di navbera rûvî û mejî de hebe, lê belê hîn jî pêdivî bi lêkolînên firehtir heye ji bo dîyarkirina mekanîzmayên van bandoran, û heta çi radeyê dikare van encaman bi rengekî piştrast belav bike.
Ev encam di çarçoveya giringîpêdana zêde bi lêkolîna sûdmendîya xurekên xwezayî û rola wan di piştgirîya tenduristîya mirovan de tên.
