Şam-SANA
Komîteya Niştimanî ya Nehiştina Qezenckirina Nerewa tekez kir ku parêzerên Sûrîyê di parastina mafan û çespandina serwerîya yasayê de xwedî roleke çalak û girîng in.
Komîteyê parêzer wekî hevparên bingehîn ên gihandina armancên bernameya “Eşkerekirina Xwebexş” û rêyên wê yên yasayî bi nav kirin; her wiha bal kişand ser rola wan di misogerkirina dirustîya rêkarên hiqûqî û sepandina wan a rast de.
Ofîsa ragihandinê ya komîteyê îro Înê ji ajansa SANAyê re ragihand ku komîte bang li parêzeran dike da ku rola xwe ya pîşeyî di alîkarî û şîretkirina miwekilên xwe de bi cih bînin.
Ev yek ji bo têgihîştina rêkar û derfetên yasayî yên berdest e; çi ji bo kesên ku dixwazin bi daxwaza xwe “eşkerekirina xwebexş” bikin an jî ji bo kesên ku rêkarên yasayî li dijî wan hatine destpêkirin û dixwazin rewşa dozên xwe bişopînin û kêmasîyên wan li gorî rêgezên hiqûqî temam bikin.
Komîteyê rola parêzeran di amadekirin, rêkxistin û pêşkêşkirina belge û kaxezên pêwîst de li ser navê kesên pêwendîdar bilind nirxand.
Hat dîyarkirin jî ku şopandina kêmasîyan û pêşkêşkirina zelalkirinên hûrbîn ji alîyê parêzeran ve, dibin sedema lezkirina lêkolîna dosyayan û gihandina encamên yasayî yên dadmendane û zelal.
Komîteyê amaje bi wê yekê kir ku welatî û parêzer dikarin rasterast bi rêya beşa pêwendîyan û kanalên wê yên fermî têkilîyê bi wan re deynin û ji bo agahî û xizmetên berdest serdana malpera fermî bikin. http://www.igcc.gov.sy
