Şam-SANA
Hêzên Ewlehîya Hundirîn îro Înê, ragihand ku wan du endamên rêxistina DAIŞê ya terorîst ku li herêma Seyide Zêneb ya li gundewarê Şamê bombeyeke vedayî diçandin, bêbandor kirine. Ev yek di dema encamdana erka dewrîyeke şevê de li ser rêyên ku diçin baregeh û navendên hikûmetê yên li herêmê pêk hat.
Hêzên Ewlehîya Hundirîn di daxuyanîyekê de got: Endamên dewrîyeyê guman ji du kesên rûpêçayî birin ku li kêleka rê sekinîbûn, dema ku hewl dan wan rawestînin da ku nasnameya wan piştrast bikin, wan gule ber bi endaman ve berdan, ku di encamê de pevçûnek derket û bi bêbandorkirina wan bi dawî bû.
Her wiha dîyar kir ku bi kontrolkirina cihê bûyerê, eşkere bû ku her du gumanbar li ser çandina bombeyeke vedayî dixebitîn wek amadekarîyekê ji bo encamdana kiryareke terorîstî ku sazîyeke hikûmetê dike armanc. Her wiha li cem wan bombeyên vedayî û çek hatin dîtin, û têkilîya wan bi rêxistina DAIŞê ya terorîst re hat piştrastkirin.
Wezareta Navxwe hewldanên xwe yên ewlehîyê ji bo têkoşîna li dijî terorê, parastina welatîyan û çespandina ewlehî û aramîyê berdewam dike, ku Hêzên Ewlehîya Hundirîn bi hevkarîya Dezgeha Îstixbarata Giştî gelek planên terorîstî ku rêxistinê dixwest di heyama borî de pêk bîne, pûç kirin.
