Şam – SANA
Duh Çarşemê, Wezareta Navxweyî hûrgilîyên tawana teqîna terorîst a ku ji alîyê rêxistina DAIŞê ve hatibû encamdan û Dêra Mar Îlyas li taxa El-Diwêl’e ya Şamê di 22ê Hezîrana 2025an de kiribû armanc, eşkere kirin.
Her wiha planeke hevdem ji bo armancgirtina mezargeha Seyîde Zeynebê hat eşkerekirin. Wezaretê tekez kir ku armanc lêdana tevna civakî û sorkirina raya giştî li dijî Dewleta Sûrîyê ya Nû bû.
Cîgirê Wezîrê Navxweyî Lîwa Ebdilqadir Tehan di vîdyoyekê de ku ji alîyê wezaretê ve hat weşandin got: “DAIŞê heyama yekem a rizgarkirina Sûrîyê, hilweşîna pergalên ewlehî û leşkerî û nebûna tevahî ya hêzên ewlehîyê bi kar anî”.
Cîgirê Wezîrê Navxweyî axaftina xwe wiha domand: “Rêxistina DAIŞê ji çoltera Sûrîyê ber bi parêzgeh û kûrahîya Sûrîyê ve tev gerîya, ligel destdanîna ser hin embar û cebilxaneyên çek û teqemenîyan û ev yek bû sedem ku di destpêka qonaxa rizgarkirinê de hin operasyonan pêk bîne”.
Tehan dîyar kir ku berîya rizgarkirinê, rêxistina DAIŞê hêzên şoreş û opozîsyonê dikirin armanc, û di navçeyên ku berê hatibûn rizgarkirin de tu operasyon li dijî pêkhateyên olî nehatibûn tomarkirin. Wî destnîşan kir ku ji sedî 99ê operasyonên wan li dijî hêzên şoreşê bûn.
Wî anî ziman ku stratejîya DAIŞê piştî rizgarkirina Sûrîyê guherî; piştî ku komên leşkerî beşdarî Wezareta Parastinê bûn û pergalên ewlehî û leşkerî hatin avakirin, rêxistina DAIŞê berê xwe da armancgirtina pêkhateyên din ên civaka Sûrîyê.
Lîwa Ebdilqadir Tehan bal kişand ser armancgirtina Şîeyan li mezargeha Seyîde Zeynebê û Mesîhîyan li hin deveran, di nav de Dêra Mar Îlyas li Şamê.
Tehan piştrast kir ku armanca sereke ya van operasyonên DAIŞê sorkirina gelê Sûrîyê li dijî dewleta nû ya Sûrîyê bû.
Mekanîzmayên karkirina DAIŞê û planên wê yên terorîstî
Di mikurhatinên xwe de, terorîstekî got ku rêxistinê piştî hilweşîna rejîmê dest bi veguhestina ji çolterê ber bi bajarên Sûrîyê ve kir da ku rêzên xwe ji nû ve rêk bike û şaneyên belavbûyî di nav parêzgehan de ava bike, bi armanca hêsankirina tevgerê û xweveşartina di nav xelkê de.
Dewlet hemû welatîyên xwe diparêze
Ji alîyê xwe ve, efserekî Rêveberîya Têkoşîna Dijî Terorê daxuyand ku stratejîya rêxistinê li ser armancgirtina cihên peristinê yên ku taybetmendîya wan li cem pêkhateyên gelê Sûrîyê heye ava bûbû, bi armanca çêkirina dubendîyê di navbera van pêkhateyan de û qelskirina dewleta nû.
Daxwaza dadperwerîyê û redkirina fîtneyê
Di şahidîyên rizgarbûyî û malbatên qurbanîyan de, Mary Berhûm got ku piştî teqînê ew ket hundirê kenîseyê û xwîn li ser pêlikan dît, bêhna barût û lastîka şewitî kir û piştrast kir ku ew ji dîmenê şok û mat bûye.
Li dawîyê jî xizm û malbatên qurbanîyan daxwaza dadperwerîyê kirin û tekez kirin ku Sûrî bi hev re jîyane û hewldanên çêkirina fitne û dubendîyê dê bi ser nekevin û pûç bibin.
