Şam-SANA
Wezîrê Rewşên Awarte û Birêvebirina Karesatan Raid El-Salih tekez kir ku xwebexşê Berevanîya Sivîl Hemze El-Emarîn, yê ku berî salekê li Siwêdayê di dema pêkanîna erkekî mirovî de hatibû revandin, hîn jî di dilê hevalên xwe de amade ye. Her wiha tekez kir ku armancgirtina karkerên mirovî destdirêjîyek e li ser nirxên mirovahîyê.
Wezîr El-Salih di postekê de li ser platforma “X”ê duh Sêşemê ragihand ku El-Emarîn bîskekê jî ji bîra wî naçe, û dengê wî hê jî di bîra wî de zindî ye her gava ku ew rojên bersivdana erdheja wêranker a di Sibata sala 2023an de tîne bîra xwe, dema ku wî serokatîya tîma xwe li bajarê Cindirêsê dikir û zêdetirî du rojan bê rawestan kar dikir.
Wezîr El-Salih di berdewamîya gotina xwe de got: El-Emarîn wê çaxê rawestana ji bo bêhnvedanê red kiribû û tekez kiribû ku hîn kesin hene ku li benda rizgarkirinê ne. Her wisa dîmenên wêrekîya wî ya di rûbirûbûna şewatên sala 2025an de û biryardarîya wî ya li ser parastina mirovan heta kêlîya dawî, di bîra hevalên wî de zindî mane.
Navborî bal kişand ser derbasbûna salekê di ser revandina El-Emarîn re ji alîyê komeke çekdar ve li bajarê Siwêdayê, di dema cîbicîkirina erkekî mirovî de ji bo derxistina sivîlan û endamên tîmeke Neteweyên Yekbûyî (NY).
Wezîrê Rewşên Awarte tekez kir ku El-Emarîn jîyana xwe ji bo rizgarkirina canê xelkê terxan kiribû, û di bin şert û mercên herî dijwar de her dem di refên pêşîn ên bersivderan de bû, û peyama mirovahîyê di ser her tiştî re digirt, û piştrast kir ku hevalên wî dê wî ji bîr nekin û dev jê bernedin.
