Şam-SANA
Wezareta Navxwe biryara hejmar /144/ derxist, ku tê de rênimayên cîbicîkirinê yên pêwîst ji bo cîbicîkirina hukmên mersûma hejmar /13/ ya sala 2026an hatine dîyarkirin. Ev mersûm taybet e bi dayîna hevwelatîya Sûrîyê bo wan welatîyên Kurd ên ku hukmên biryarê li ser wan pêk tên.
Di xala yekem a biryarê de hatiye dîyarkirin ku kesên dixwazin hevwelatîya Sûrîyê wergirin, divê serlêdaneke fermî pêşkêşî navendên dîyarkirî bikin; çi bi daxwaznameyeke kesane li gorî modela hejmar /1/, an jî bi daxwaznameyeke malbatî ku ji hêla serokê malbatê ve li gorî modela hejmar /2/ tê pêşkêşkirin.
Madeya duyem a biryarê navendên wergirtina daxwaznameyan destnîşan dike: Li parêzgehên Şam, Heleb, Reqa û Dêra Zorê (ji bo her yekê navendek), û li parêzgeha Hesekê (pênc navend) hatine veqetandin.
Li gorî madeya sêyem, li her navendekê komîteyek ji bo lêkolînkirina daxwaznameyan tê avakirin. Dadwerek ji Wezareta Dadê Serokatîya komîteyê dike û endamên wê jî nûnerê Karûbarên Sivîl û rîspîyekî Kurd e ku hevwelatîya Sûrîyê wergirtiye.
Madeya çarem behsa avakirina komîteyên jêrîn (leqî) li her pênc parêzgehan bi serokatîya parêzgeran dike. Li gorî madeya pêncem, kesên ku biryarên komîteyên parêzgehan bandoreke neyînî li wan kiriye, dikarin di nava panzdeh rojan de ji dîroka agahdarkirinê, nerazîbûneke nivîskî pêşkêşî Komîteya Navendî bikin.
Komîteya Navendî, li gorî madeya şeşem, bi serokatîya alîkarê Wezîrê Navxwe ji bo Karûbarên Sivîl û bi endamtîya dadwer û pisporên ji alîyên peywendîdar tê avakirin. Xala heftem jî destnîşan dike ku navên kesên hatine qebûlkirin li gorî dabeşkirina malbatî di bernameyeke taybet a îstatîstîkî de têne tomarkirin.
Her wiha biryar di madeya 9ê de hişyarîyê dide ku her daxwaznameyeke ku bê piştrastkirin zanyarîyên wê ne rast in an belgeyên wê sexte ne, dê bi awayekî fermî bê betalkirin û li gorî qanûnên berkar derbarê xwedîyê daxwaznameyê rêkarên qanûnî bên wergirtin.
