Şam-SANA
Sûrîyê spasîya xwe ya kûr ji bo wan welatan anî ziman ku biryara “Colana Sûrîyê” pejirandin û dengê erê danê, ya ku îro 3yê Kanûna Pêşîn a 2025an ji alîyê Komeleya Giştî ya Neteweyên Yekbûyî (NY) ve li New Yorkê hat pejirandin, nemaze welatên ku dengê xwe li gorî salên borî guhertine.
Wezareta Karên Derve û Koçberan di daxuyanîyekê de got: Zêdebûna hejmara welatên ku dengê erê dane biryarê ji 97an di sala borî de bo 123an di îsal de, bi awayekî zelal asta piştevanîya mezin ji bo Sûrîya nû û helwesta wê ya niştimanî û prensîbî ya pabendbûna bi Colana Sûrîyê ya dagirkirî nîşan dide. Ev yek hewldanên dîplomatîk ên xurt radixe ber çavan, ji ber ku biryar daxwazê ji Îsraîlê dike ku ji hemû axa Colana Sûrîyê ya dagirkirî heta hêla 4ê Hezîrana 1967an vekişe. Her wiha tekezîyê li ser prensîba ku nabe ax bi darê zorê were bidestxistin û neqanûnîya avakirina niştecihgehan û çalakîyên din ên Îsraîlî li Colana Sûrîyê ya dagirkirî dike. Biryar radigihîne ku Îsraîl heta niha pabendî biryara 497 a Konseya Ewlekarîyê nebûye, û tekez dike ku berdewamîya dagirkirina Colanê û pêvekirina wê ya “defakto”, li pêşîya bidestxistina aştîyeke dadwer, berfireh û mayînde li herêmê astengî ye.
Di vê çarçoveyê de, Sûrîye spasî û pêzanîneke mezin pêşkêşî Komara Misirê ya Erebî ya bira dike ji ber pêşkêşkirina proje-biryarê, û helwesta neguher a wan welatên ku mîna salên borî dengê erê dane biryarê, bilind dinirxîne.
Li vir Komara Erebî ya Sûrîyê pesnê van welatan dide: Fransa, Îrlanda, Andora, Antigua û Barbuda, Awustirya, Bengladeş, Belçîka, Bosna û Herzegovîna, Burkîna Faso, Danîmarka, Fînlandiya, Gabon, Almanya, Grenada, Guatemala, Îzlanda, Îtalya, Letonya, Liechtenstein, Luksembûrg, Malta, Montenegro, Nepal, Holenda, Nîjerya, Norwêc, Polonya, Portekîz, Moldova, San Marîno, Slovenya, Spanya, Swêd, Swîsre, Tîmor-Leste, Ukrayna, Tenzanya, Ûrûguay û Vanûatû, her wiha pesnê dewletên ku di dengdanê de ji bêalîbûnê derbasî piştgirîyê bûn jî dide. Bi vê yekê wan rêzgirtina xwe ji bo hiqûqa navneteweyî û peymana NY nîşan da, ku di mijara dagirkerî û rênedana bidestxistina axê bi darê zorê de her tim zelal û eşkere bûye.
Tevlîbûna Komara Erebî ya Sûrîyê di danûstandinên cidî de derbarê mijarên teknîkî ku dibe têkilîya wan bi ewlehîya wê û ewlehî û aramîya herêmê hebe, nayê wateya destberdana wê ji wê yekê ku Colan axeke Sûrîyê ye, û ev helwestek e ku bi rêya seferberîya navneteweyî ya serkeftî ji bo vê biryarê, şênber kiriye.
