Şam-SANA
Wezareta Dadê ya Sûrîyê, giştînameyek ji bo yekkirina rêbazên reftara dadgehan bi biryar û darazên ku ji dadgehên bakurê Sûrîyê derketine, derxist. Ev pêngav, piştî wê yekê hat ku pêvajoya tevlîkirina van dadgehan di nav pergala dadwerî ya Komara Erebî ya Sûrîyê de kuta bû.
Di giştînameyê de, hat dîyarkirin ku wezaretê “cudahî di reftara dadgeh û dezgehên cîbicîkirinê de” bi biryar û belgeyên cîbicîkirinê yên ku ji dadgehên Bakurê Sûrîyê di dema berî tevlîbûnê de derketibûn, dîtiye.
Li gorî giştînameya nû, divê hemû biryar, daraz û belgeyên ku ji wan dadgehan derdikevin werin pejirandin, bi şertê ku li gorî yasayê bin û daneyên bingehîn ên wekî navê dadgehê, dîroka derxistina biryarê, navê dadgerên beşdar, navê nûnerê dozgerîyê û navê alîyên dozê tê de bin.
Her wiha divê di belgeyên fermî de kurteya daxwaz û parastinên alîyan, belgeyên wan, nêrîna dozgerîya giştî, sedemên darazê û naveroka wê, her wisa mohra dadgehê li ser wêneyê darazê hebe.
Giştînameyê bang li hemû dadgeh û dezgehên dadwerî kir ku “bandorên qanûnî” yên biryar û belgeyên ku ji alîyê dadgehên Bakurê Sûrîyê ve hatine derxistin, li gorî vê yekê bi cih bînin.
Giştînameyê Rêveberîya Çavdêrîya Dadwerî, Serokên Dadwerîyê û Parêzerên Giştî erkdar kir ku çavdêrîya başbicihanîna naveroka wê bikin û her binpêkirinekê ji wezaretê re ragihînin, ku ev hewldana wezaretê ji bo şopandina cîbicîkirina biryarê nîşan dide.
