Heleb-SANA
Fermandarîya Ewlehîya Hundirîn a Helebê, piştrast kir ku ji bo eşkerekirina hûrgilîyên bûyera derketina agir li girtîgeha bajarê Kobanê yê li gundewarê Helebê, mirina heft girtîyan, destnîşankirina berpirsyarîyên derbarê şewatê û wergirtina hemû rêkarên yasayî yên pêwîst li hember her kesê ku tevlîbûna wî bê selmandin, lêpirsînek hatiye vekirin.
Fermandarîya Ewlehîya Hundirîn di daxuyanîyeke ronîkirinê de derbarê bûyerên girtîgeha bajarê Kobanê ku îro Şemîyê li ser kanala xwe ya Telegramê weşand, got: Piştî wan rûdanên ku duh bajêr dîtin, hinek kesan li hundirê girtîgehê tevlîhevî derxist holê û agir berdan hinek qawîşan, ev yek jî bû sedema belavbûna agir li nav girtîgehê; di encamê de heft girtîyan jîyana xwe ji dest da û bi dehan kes jî bi bûyerên xeniqîn û şewatê birîndar bûn.
Fermandarîya Ewlehîya Hundirîn di berdewamîya daxuyanîya xwe de dîyar kir ku birêvebirina girtîgeha Kobanê hîn derbasî alîyên fermî yên hikûmetê nebûye, proseya wergirtin û radestkirinê jî girêdayî rêçeke dadwerî û qanûnî ye.
Her wiha piştrast kir ku rêkarên dosyaya girtîgehê li cem dezgehên dadwerî yên pêwendîdar hîn jî berdewam in, li benda derxistina biryar û bîrnamyên pêwîst e da ku proseya wergirtinê li gorî rêgezên fermî di çarçoveya plana entegrasyonê de biçe serî, lewra ev yek bû sedema neqedandina radestkirina kirdarî berî ku bûyerê biqewime.
Fermandarîya Ewlehîya Hundirîn dupat kir ku alîyên pêwendîdar pêşveçûnên bûyerê dişopînin, dê encamên lêpirsînan jî yekser piştî temamkirina wan li gorî rêgezên fermî ragihînin.
Li dawîyê jî fermandarîyê sersaxî û hevxemîya xwe ya kûr bo malbatên kesên ku jîyana xwe ji dest dane anî ziman, her wisa hêvîya başbûneke lezgîn ji bo birîndaran xwest.
