Şam-SANA
Parêzgeha Şamê derbarê gotûbêjên li ser Mola El-Malikî daxuyanîyeke ronîkirinê weşand.
Parêzgehê destnîşan kir ku wê bi hûrgilî îdîayên ku vê dawîyê li ser torên civakî derbarê vê mijarê de hatine belavkirin şopandiye û dîyar kir ku ew agahî û encamên ku hatine weşandin çewt in û dûrî rastîyê ne.
Parêzgehê di daxuyanîya xwe ya îro Yekşemê de eşkere kir ku bingeha vê dozê vedigere sala 2007an; dema ku peymana veberhênanê ya bi şêwazê “BOT”ê di navbera Parêzgeha Şamê û Xalî Hekîm de hatibû îmzekirin.
Li gorî peymanê, veberhêner ji kîsê xwe mol ava û amade kiriye, di berdêla mafê veberhênanê yê bîst salan de.
Di berdewamîya daxuyanîya parêzgehê de hat dîyarkirin ku piştre li ser berdêla veberhênanê nakokîyek derketiye holê û mol bi zorê û bêyî hinceteke yasayî ya zelal hatiye valakirin, tevî ku biryareke dadgehê di berjewendîya veberhêner de hebû.
Piştî vê yekê, di sala 2018an de mol radestî veberhênerekî din bi navê Wesîm Qetan hatibû kirin, yê ku bi hinek kesên nêzî rejîma berê re di nava têkilîyan de bû.
Hat eşkerekirin jî ku Xalî Hekîm piştî rizgarkirinê, bi amadebûna çend rîspî û kesayetên naskirî, serî li parêzgehê daye da ku neheqîya li wî hatibû kirin were rakirin.
Daxwaza wî bi awayekî fermî hat wergirtin û rêveberîyên pêwendîdar hatin erkdarkirin ku dosyeya wî bi hûrgilî lêkolîn bikin û doza li pêşberî Dadgeha Îdarî bişopînin.
Parêzgehê destnîşan kir ku mafê Xalî Hekîm bi rêya peymana şirîkatîyê ya bi demeke dîyarkirî ligel Sindoqa Serwerîyê hat dabînkirin.
Ev peyman bi rêjeyeke dîyarkirî ya qezancê û bi tibabeke kêmtir ji ya ku Wesîm Qetan werdigirt, hat encamdan.
Di beramberî vê yekê de, veberhêner dev ji daxwaza wan qerebûyên darayî berda ku mafê wî bûn û li pêşberî Encumena Dewletê doz li ser wan vekiribû.
Bi vî awayî, parêzgeh ji barên darayî yên giran hat parastin, di heman demê de berdewamîya veberhênana molê ji bo berjewendîya dewletê hat misogerkirin.
