Şam-SANA
Li pişt dîmena qerebalixa serlêderan û tevgera li nav holên Pêşangeha Navdewletî ya Şamê, hin hûrgilîyên xebatê hene, ji alîyê jinên Sûrî ve tên bicîanîn; ew erkên ku hewcedarî amadebûn û berpirsyarîyeke rasterast in, ji parastina ewlehîyê û nîşandana rêyan dest pê dike heta digihîje hawarçûn û pêşkêşkirina xizmetên bijîşkî yên lezgîn.
Li korîdorên pêşangehê, Meryem Îbrahîm, endama Polîsên Geştûguzarîyê, ya ku erka parastina ewlehîyê û alîkarîya serlêderan bi cih tîne, tekez dike ku hebûna jinan di nav polîsan de rehetîyeke mezintir dide jin û malbatan di dema daxwaza alîkarîyê di rewşên taybet de, û derfetek e ji bo îspatkirina şîyana jinê di hilgirtina berpirsyarîyê di qadên curbicur de.
Di nav tîma rêkxistinê de, Bîsan Yûsif berpirsyarîya pêşwazîkirina serlêderan û nîşandana rê bo wan û alîkarîya wan di wergirtina kart û zanyarîyan de digire ser milê xwe. Yûsif bal kişand ser wê yekê ku beşdarbûna jinê şîyana wê ya xebatê di warên cihêreng de nîşan dide, bi rêya encamdana erkên ku pêdivîya wan bi leza bersivdanê û danûstandina bi karîgerî û berpirsyarî bi hejmarên mezin re heye.
Di warê mirovî de, Xedîr El-Xuderî, xwebexşkara Heyva Sor a Erebî ya Sûrî, û Îslam ‘Îd, alîkara bijîşkî di tîmên Parastina Sivîl de, beşdarîyê di pêşkêşkirina xizmetên bijîşkî ji serlêderên pêşangehê re dikin; ji serderîya bi birînên sivik re heta veguhastina rewşên giran bo nexweşxaneyan. El-Xuderî zelal kir ku hebûna jinan di tîmên alîkarîya lezgîn de derfeteke mezintir dide jinên ku pêdivîya wan bi alîkarîyê heye, da ku rewşa xwe ya taybet bi rehetî şirove bikin. Di heman demê de ‘Îd daxwaz ji jinên Sûrî kir ku bi hêvîyên xwe ve girêdayî bimînin û kar û bizavê ji bo bicîanîna wan bikin.
Jina Sûrî di Pêşangeha Navdewletî ya Şamê de, hebûna xwe ya kartêker wek beşekî bingehîn ji tîmên xebatê yên ku rojane karûbarên bûyeran bi rê ve dibin diçespîne, û bandoreke xwe ya rasterast di birêvebirina xebatên pêşangehê û xizmeta serlêderan de dihêle.
