Tertûs-SANA
Rêveberîya Ewaqafa Tertûsê, duh Çarşemê, 60 xwendekarên kur û keç ên pileyên yekemîn û cîyawaz di pêşbirka Quranê ya havînê û çalakîyên perwerdeyê de bi dest xistine xelat kirin. Ev xelatkirin di ahengekê de ku ji alîyê Rêveberîya Xelekên Perwerdeyê ve li Navenda Çandê ya bajêr hatibû organîzekirin hat encamdan, bi amadebûna nêzîkî 300 xwendekarên kur û keç ên di bernameyên cihêreng ên havînê.
Rêveberê Ewaqafa Tertûsê Husam Hac Hisên, di daxuyanîyekê de ji bo SANAyê, dîyar kir ku kesên hatine xelatkirin di hejmarek pêşbirk û çalakîyan de pileyên bilind bi dest xistine. Her weha bal kişand ser wê yekê ku qebareya beşdarîyê, nîşana pirbûna tevlêbûna bernameyên havînê û perwerdeyê ye, û rola wan bernameyan di pêşxistina şîyanên xwendakaran û dagirtina dema wan a vala bi çalakîyên sûdemend, dide xuyakirin.
Ji hêla xwe ve, Serokê Rêveberîya Karûbarên Mizgeftan Şêx Mihemed El-Nasir, dîyar kir ku vê xelatkirinê kesên yekemîn di ezberkirina Qurana Pîroz de, û yên di dewrîyê futbolê û pêşbirka çandî ya Îslamî de bi ser ketine, li xwe girtine. Her weha da zanîn ku armanc ji pirrengîya çalakîyan ew e ku beşdarîyê di avakirina kesayetîya tekûz ya xwendekar de bike, ya ku zanîn, werziş, karê komî û gîyanê hevrikîya erênî digihîne hev.
Di heman mijarê de, hejmarek ji xwendekarên ku hatine xelatkirin, dan dîyarkirin ku çalakîyên havînê derfet da wan da ku sûdê ji dema xwe ya vala wergirin û behreyên xwe pêş bixin, û tekez kirin ku ev xelatkirin handan e ji bo berdewamkirina serkeftinê, bi taybetî ku bernameyan ezberkirina Qurana Pîroz, çanda îslamî, werziş û hevrikîyên komî bi hev re li xwe digirtin.
