Siweyda-SANA
Rêveberê Ewlehîya Hundirîn li Siweydayê Silêman Ebdilbaqî piştrast kir ku komên derveyî yasayê xwendekarên bawernameya amadeyî ji gihîştina navendên wan ên ezmûnan li Şamê asteng kirin, û gef li hinan xwarin û êrîşî wan kirin, tevî hewldan û rênimayên ku dewletê ji bo dabînkirina veguhastin û parastina wan wergirtibûn.
Ebdilbaqî di hevpeyvînekê de ligel kanala “Al-Ixbarîye” ya Sûrîyê duh Pêncşemê dîyar kir ku Fermandarîya Ewlehîya Hundirîn berî nêzî meh û nîvekê, bi hevahengîya Wezareta Perwerdeyê û Parêzgeha Siweydayê, planek ji bo dabînkirina ewlehîya xwendekarên ku diçin navendên ezmûnan li Cermana, El-Eşrefîye û Sehnaya amade kiribû. Her wiha bal kişand ser wê yekê ku zêdetirî hezar endamên Hêzên Ewlehîya Hundirîn li ser rêya Şam-Siweyda belav bûbûn ji bo dabînkirina vê pêvajoyê.
Navborî da zanîn ku hejmarek ji xwendekaran rastî gefa çekan hatin û nehiştin herin Şamê ji bo ezmûnên xwe bidin. Wî destnîşan kir ku nêzîkî 1500 xwendekarên bawernameya amadeyî di dema borî de li Şamê amade bûn û beşek ji wan karîbûn ezmûnan bidin, di demekê de ku hejmara giştî ya xwendekarên bawernameya amadeyî nêzîkî 7400 xwendekar e.
