Heseke-SANA
Alîkarê parêzgarê Hesekê û berdevkê tîma serokatîyê Ehmed El-Hîlalî, destpêkirina karwanên vegera koçberên herêma Efrînê bo gund û bajarokên wan li gundewarê Helebê yê bakur ragihand. Ev yek hevdem e ligel amadekarîyên yasayî ji bo girtina dosyayên hejmarek ji girtî û binçavkirîyan.
El-Hîlalî di daxuyanîyeke taybet de ji bo Rêveberîya Ragihandina Hesekê dîyar kir ku sibe karwanekî ku nêzî 1500 malbatên koçberên Efrînê li xwe digire, dê ji bajarê Qamişlo ber bi herêmên wan ên resen ve bi rê bikeve.
Berdevkê tîma serokatîyê piştrast kir ku hemû tedbîrên ewlehîyê yên awarte yên têkildarî vegera xelkê Efrînê hatine betalkirin û destnîşan kir ku derî ji bo koçberên din vekirî ye ku di dema dixwazin de vegerin.
Di heman çarçoveyê de, El-Hîlalî bal kişand ser wê yekê ku hinek malbatên Efrînî ji ber kar û berjewendîyên xwe yên bazirganî û pîşeyî, baştir dîtine li parêzgeha Hesekê bimînin û li wir bi cih bibin.
Di warê ewlehî û dadwerîyê de, El-Hîlalî eşkere kir ku operasyoneke dawî ya serjimêrî û kontrolkirina dosyaya girtîyên Hêzên Sûrîya Demokratîk (HSD)ê yên li cem dewletê tê kirin, da ku berîya Cejna Qurbanê ya pîroz biryara berdana wan were dayîn.
Derbarê welatîyên Sûrîyê yên girtî ku berê bo Komara Iraqê hatibûn dersînorkirin, alîkarê parêzgar piştrast kir ku alîyên peywendîdar di dewletê de vê dosyayê bi berdewamî û bi hûrbînî dişopînin, û niha hemû rêkarên qanûnî û lojîstîkî yên pêwîst ji bo dabînkirina vegera wan bo xaka Sûrîyê temam dikin.
