Şam – SANA
Şêx Leys El-Belûs şîna Şêx Raid El-Metnî ragihand, ku çavkanîyên herêmî li parêzgeha Siwêdayê dîyar kirin ku wî li girtîgehên komikên deryasayî yên bi navê “Pasevanên Niştimanî” di bin îşkenceyê de jîyana xwe ji dest daye. Şêx Leys El-Belûs “çeteyên cudaxwaz û xayinên welat” yên girêdayî Hikmet El-Hicrî û kesên li dorûbera wî berpirsyarên vê tawanê dîtin.
Şêx El-Belûs di daxuyanîyekê de ku li ser hesabê xwe yê Facebookê belav kir, got: “Îro em li ser karesateke nû şiyar bûn, ew jî kuştina Şêx Ebû Rêdan Raid El-Metnî ye li ser destê çeteyên cudaxwaz û xayinên welat, komika Hikmet û kesên li dorûbera wî.”
El-Belûs wiha pê de çû: “Wan Şêx Raid El-Metnî bi neheqî û dijmindarî girtin û mikurhatin di bin îşkenceya hovane de jê standin bêyî ku li pêş raya giştî yan alîyekî qanûnî belge bikin. Paşê ew bi awayekî hovane ku tenê li çeteyên dûrî nirx û adetên çîyê tê, kuştin.”
Şêx El-Belûs tekez kir ku: “Ev çete bi xwe ew in ku tawana kuştina endezyar Kerem Munzir û ciwanên din ên niştimanperwer kirine. Ew in ku li bajaroka Mezre’e û gundên wê dizî û talanî kirin û şewitandin. Ew in ku êrîşî mal û qûtê xelkê kirin û hurmeta şehîdan binpê kirin.”
Şêx El-Belûs daxuyanîya xwe wiha bi dawî kir: “Me gelek û pir caran hişyarî li ser van diz û kirêgirtîyan da, baskên rejîma hilweşîyayî û amûrên dagirkerê kujer, ku bazirganî bi xwîna şehîdên sivîl ên Çîyayê Ereban kirin.”
Şêx El-Belûs sersaxîyên xwe yên kûr pêşkêşî malbata Şêx El-Metnî kir û ji Xwedê xwest ku êşa wan sivik bike.
Bûyera kuştina Şêx Raid El-Metnî di çarçoveya rewşa bêserûberîya ewlehîyê de tê ku parêzgeha Siwêdayê tê re derbas dibe, ku komikên çekdar ên derveyî qanûnê di bin navê “Pasevanên Niştimanî” yên girêdayî Hikmet El-Hicrî lê belav bûne. Ev komik serkutî û girtinan pêk tînin û alîkarîyên mirovî didizin.
