Şam-SANA
Tora Çavdêrîya Civakî ya Sûrîyê – Yekîneya Piştgirîya Aramîyê, semînereke taybet ji bo gotûbêjkirina encamên proseya şopandina hilbijartinên Encumena Gel a Sûrîyê li dar xist, li ser bingehê dane û agahîyên ku ji tîmên şopandinê yên meydanî li parêzgehên cuda yên Sûrîyê hatine komkirin, ku hejmara wan 42 tîmên şopandinê yên meydanî bûn û li 11 parêzgehan hatibûn belavkirin.
Rêveberê Cîbicîkar ê Yekîneya Piştgirîya Aramîyê, Munzir El-Selal, di gotinekê de tekez kir ku avakirina Encumena Gel a nû pêngavek ber bi paşerojeke baştir ve ye ku li ser hîmê zîrekî û elîtan e, dûrî alîgirîyên teng ên nijadî, mezhebî yan êlperestî.
El-Selal piştrast kir ku pêwîstîya qonaxa niha bi nermbûnekê di mekanîzmayên hilbijartinê de heye, wek pejirandina desteyên hilbijartinê wek mekanîzmayeke demkî ya pêdivî di çarçoveya heyî de. Navborî amaje bi wê yekê jî kir ku pêdivîya paşererojê bi veguhertineke gav bi gav ber bi hilbijartinên rasterast ve heye ku hemû Sûrî, jin û mêr, tê de beşdar bibin.
Di raporê de hat gotin ku torê rêbazeke hûr û pirast pejirandiye û ku rêbaz ji prensîbên bêalîbûn û şefafîyetê derketiye, ligel liberçavgirtina cihêrengîya erdnîgarî di tîmên şopandinê de ji bo misogerkirina nûnertîya hevseng. Her wiha têbînîyên rasterast û hevpeyvînên kurt bi dengderan re hatine komkirin ji bo nirxandina rewşa navendên dengdanê û asta rêxistinbûnê û razîbûna dengderan ji ezmûna hilbijartinê.
Di berdewamîya gotina xwe de, El-Selal dîyar kir ku avakirina Komîteya Bilind a Hilbijartinan nêrîneke sîyasî nîşan da ku tevî kurtbûna dema amadekarîyê dikare li ser were avakirin, û performansa giştî ya komîteyê bi jêhatîbûna rêxistinî dîyar bû. Her wisa roja dengdanê pabendbûnek bi rêkarên yasayî yên giştî hebû ku nasnameya dengderan hate piştrastkirin û pêvajoyên hejmartin û cudakirinê bi şefafîyeteke bilind bi rê ve çûn.
Berdevkê Komîteya Bilind a Hilbijartinên Encumena Gel, Newar Necme, ji alîyê xwe ve tekez kir ku arîşeya herî mezin misogerkirina durustîyê di hilbijartina endamên desteyên hilbijartinê de bû, ku komîte li ser vê yekê xebitî û amaje bi wê yekê kir ku komîteyê bi rêjeya di navbera 70 û 80 ji sedî de di pêkanîna vê armancê de bi ser ket.
Necme axaftina xwe domand û got: “Rexneyên têkildarî nûnertîya jinan û hin pêkhateyên gelê Sûrîyê rastîya civaka Sûrîyê bi xwe nîşan didin, ji ber ku komîteyê hewl da dadmendîyê bêyî parvekirinê pêk bîne, çiku pêwîstîya civaka Sûrîyê bi demê heye da ku tecrûbeya xwe ya demokratîk a taybet ku dê nasnameya wê ya welatî dîyar bike, geş bike.”
Komîteya Bilind a Hilbijartinên Encumena Gel a Sûrîyê di 5ê vê mehê de encamên fermî yên hilbijartinan li herêmên ku proseya hilbijartinê li parêzgehên dîyarkirî lê hatibû lidarxistin, ragihandibû.
