Amed – SANA
Zanîngeha Dîcleyê bi merasîmeke bi heybet derçûna 98 xwendekarên xwe yên navneteweyî ku ji 18 welatên cuda hatine, pîroz kir. Merasîm bi beşdarîya Cîgirê Sekreterê Giştî yê Zanîngehê birêz “Haci Yilmaz”, Ragirê Karûbarên Xwendekaran birêz “Mihemed Elî Esmer”, hejmarek zêde ji akademisyen, mamoste û malbatên xwendekaran hat lidarxistin.
Di merasîma ku ji alîyê Serokatîya Karûbarên Xwendekaran a Navendî ve hatibû organîzekirin, 98 xwendekar derçûn ku di nav wan de 45 xwendekarên Sûrî hene. Xwendekar ji beşên wekî: Bijîşkî, Diransazî, Dermansazî, Endezyarî, Perwerde, Wêje, Zanist û Peymangehên Tendurustîyê û Teknîkî bûn.
Cîgirê Sekreterê Giştî yê Zanîngehê Haci Yilmaz di axaftina xwe de dîyar kir ku “Zanîngeh ne tenê bi avahî û rûberê xwe ye, lê bi xwendekarên xwe yên ji her nijad û herêman ve zanîngeh e.” Wî zanîngeh wekî “baxçeyekî rengîn” pênase kir û anî ziman ku derîyên wan her tim ji bo xwendekaran vekirî ne, bêyî ku ferq û cudahîyê bixin navbera ziman û nijadan.
Hêjayî gotinê ye ku bingeha Zanîngeha Dîcleyê di sala 1964an de bi avakirina Fakulteya Bijîşkî (wê demê ser bi Zanîngeha Enqereyê ve bû) hat danîn û di sala 1973an de wekî zanîngeheke serbixwe hat damezrandin.
Zanîngeha Dîcleyê di nav 10 zanîngehên herî pêşîn de ye ku piştî şerê Sûrîyê pêşwazî li xwendekarên Sûrî kiriye û hêsankarîyên mezin ji bo perwerdehîya wan pêşkêş kiriye. Heta niha nêzîkî 500 xwendekarên Sûrî lê derçûne yan hîn dixwînin. Piranîya van xwendekaran ji herêmên Kobanî û Cizîrê ne û yên din jî ji bajarên wekî Hema, Idlib, Heleb û Şamê ne.
