Şam-SANA
Wezîrê Xwendina Bilind û Lêkolînên Zanistî yê Sûrîyê Merwan El-Helebî ligel şandek ji Zanîngeha Beyrûtê ya Îslamî (Fakulteya Şerîetê) bi serokatîya Elî Hesen El-Tewîl ragirê fakulteyê, hevkarîya di warê perwerdeya şer’î de, rewşa zanîngehê û îmkanên pêşxistina peywendîyan ligel wê piştî rûxandina rejîma berê gotûbêj kirin.
Her du alîyan îmkanên naskirina Zanîngeha Beyrûtê û bernameyên wê yên akademîk ji alîyê Wezareta Perwerde û Xwendina Bilind ve gotûbêj kirin. Wezîr El-Helebî zelal kir ku naskirin bi cîbicîkirina pîvanên dîyarkirî ve girêdayî ye ku wezaret dê pêşkêşî zanîngehê bike, da ku bikaribe li rewşa xwe binêre û şertên pêwîst bi cih bîne.
Her wiha civînê behsa rewşa perwerdeya şer’î li Sûrîyê û gavên ku hatine avêtin kir, wek vekirina derîyê zanîngehê li ber xwendekarên bawernameyên şer’î, berfirehkirina wê bi vekirina fakulteyên nû yên şerîetê li çend zanîngehan piştî rizgarkirinê, yekkirina mînahcan di fakulteyên cihê de, û hewldana wezaretê ji bo birêxistina perwerdeya şer’î li derveyî zanîngehê.
Şanda zanîngeha Îslamî rewşa perwerdeya şer’î li Libnanê pêşkêş kir û bal kişand ser kêşeyên herî girîng, ji wan: Nenasîna bawernameyên derçûyên peymangehên şer’î yên Sûrî yên taybet, û pêwîstîya xwendekarê Sûrî bi wergirtina îqameya qanûnî wek şertekî bingehîn ji bo tomarkirina fermî di dibistanên şer’î de. Her wiha şandê şiroveyeke berfireh li ser sîstema xwendinê, mînahc û bawernameyên ku zanîngeh dide pêşkêş kir.
Alîkarê Wezîrê Xwendina Bilind û Lêkolînên Zanistî yê Karûbarên Zanistî û Lêkolînan Xeyîs Werqozeq, û rêvebirên Peywendîyên Çandî û Lêkolînên Zanistî Numeyir Îsa û Yasir Xedre di civînê de amade bûn.
Zanîngeha Beyrûtê ya Îslamî (Fakulteya Şerîetê) sazîyeke ser bi Dar El-Fetwa ya Libnanî ye, di sala 1996an de bi biryarnameyeke komarî hatiye damezrandin. Zanîngeh fakulte û peymangehên cuda (wek Şerîet, Dadwerîya Şer’î, Huner, Zanist û Teknolojî) li xwe digire, her wiha bawernameyên xwendina bilind (Master û Doktorayê) di gelek beşan de dide.
